Tags-Zindagi

koī āvāz kyuuñ dete nahīñ sāñsoñ ke markaz se
ki tum bhī zindagī ke pech-o-ḳham meñ kho ga.e ho kyā

ishq se paidā navā-e-zindagī meñ zer-o-bam
ishq se miTTī kī tasvīroñ meñ soz-e-dam-ba-dam

zindagī kyā jaane kyuuñ mahsūs hotā hai mujhe
tujh se pahle bhī ho jaise zahr ye chakkhā huā

phuul haiñ rañg haiñ bahāreñ haiñ
zindagī kitnī ḳhūbsūrat hai

zindagī ku-e-malāmat hai koī kyā Thahre
apnī hī vaz.a kā maiñ huuñ so Thahartā gayā maiñ

mirī samajh meñ aa gayā har ek rāz-e-zindagī
jo dil pe choT paḌ ga.ī to duur tak nazar ga.ī

ham āstān-e-ḳhudā-e-suḳhan pe baiThe the
so kuchh salīqe se ab zindagī tabāh kareñ

tañg aa ga.e haiñ ishq meñ ab zindagī se ham
aa.e qazā to nazr kareñ jaañ ḳhushī se ham

mujhe chakhte hī kho baiThā vo jannat apne ḳhvāboñ kī
bahut miltā huā thā zindagī se zā.iqa merā

justujū kī huī to yuuñ takmīl
zindagī maut kī ḳhabar laa.ī

mirī baqā hī mirī ḳhvāhish-e-gunāh meñ hai
maiñ zindagī ko kabhī zahr-e-pārsā.ī na duuñ

sirf ik karb-e-musalsal hī nahīñ hai zindagī
muḳhtasar vaqfe kī sūrat hai ḳhushī bāteñ karo

ka.ī silsiloñ se juḌā huā ye jo zindagī kā safar rahā
na.ī manziloñ kī talāsh meñ ye rahīn-e-rāh-guzar rahā

ye jo zindagī kī kitāb hai ye kitāb bhī kyā kitāb hai
kahīñ ik hasīn sā ḳhvāb hai kahīñ jān-levā azaab hai

zindagī tujh pe ab ilzām koī kyā rakkhe
apnā ehsās hī aisā hai jo tanhā rakkhe

zindagī ḳhud ko na is ruup meñ pahchān sakī
aadmī lipTā hai ḳhvāboñ ke kafan meñ aisā

rukī rukī sī shab-e-marg ḳhatm par aa.ī
vo pau phaTī vo na.ī zindagī nazar aa.ī

ye kyā huā ki ab tujhī se bad-gumāñ maiñ ho gayā
maiñ sochtā thā zindagī tū mujh ko raas aa ga.ī

duur rahnā mujhe manzūr nahīñ hai tujh se
zindagī saath tire mujh ko maza detī hai

zamāna bhī mujh se nā-muvāfiq maiñ aap bhī dushman-e-salāmat
ta.ajjub is kā hai bojh kyūñkar maiñ zindagī kā uThā rahā huuñ