Tags-Zindagi

zindagī yaad aa ga.ī mujh ko
phir tirī samt merā dhyān paḌā

isī kashmakash meñ guzrīñ mirī zindagī kī rāteñ
kabhī soz-o-sāz-e-'rūmī' kabhī pech-o-tāb-e-'rāzī'

har gaam hausloñ kā yahī mudda.ā rahā
gumrāh zindagī kī masāfat do-chand ho

kisī se jab kabhī ham zindagī badalte haiñ
to phir badan kī bhī poshāk honā paḌtā hai

patā chalā ki mirī zindagī meñ likkhā thā
vo jis kā naam kabhī Diary meñ likkhā thā

'aḳhtar' ko zindagī kā bharosa nahīñ rahā
jab se luTā chuke sar-o-sāmān-e-ārzū!

bhiiḌ meñ koī shanāsā bhī nahīñ chhoḌtī hai
zindagī mujh ko akelā bhī nahīñ chhoḌtī hai

ham se rūThī har ḳhushī hai aaj kal
kashmakash meñ zindagī hai aaj kal

dil ko raas aa.ī haiñ ye mushkileñ mushkil se bahut
ab maiñ ye chāhtā huuñ zindagī āsān na ho

adū bhī ho sabab-e-zindagī jo haq chāhe
nasīm-e-sub.h hai roġhan charāġh meñ gul ke

guzar ga.ī hai to ab kyā gila karūñ tujh se
magar ai zindagī tujh pe udhār merā rahā

gar na samjhā to 'nīraj' lagegī kaThin
zindagī ko jo samjhā to āsān hai

tamām duniyā meñ DhūñD aayā maiñ gum-shuda zindagī kī sūrat
milī to mujh ko hayāt-e-muztar magar milī ajnabī kī sūrat

āsā.ish-e-zindagī kī hasrat
maazī kā naqsh ban chukī hai

rañj kyā kyā haiñ ek jaan ke saath
zindagī maut hai hayāt nahīñ

mirī zindagī bhī mirī nahīñ ye hazār ḳhānoñ meñ baT ga.ī
mujhe ek muTThī zamīn de ye zamīn kitnī simaT ga.ī

ai dost zindagī kī mujhe bad-duā na de
maiñ ḳhaak ho chukā huuñ muqaddar liye hue

thā kisī zālim kā apnā mudda.ā-e-zindagī
jis ko apnī zindagī kā mudda.ā samjhā thā maiñ

naqsh-hā-e-rañgīñ kā ik nigār-ḳhāna hai
zindagī haqīqat hai zindagī fasāna hai

har ghaḌī bīmār ho kar rah ga.ī
zindagī bekār ho kar rah ga.ī