Tags-Zindagi

safar-e-zindagī nahīñ āsāñ
har taraf raah meñ haiñ sañg-e-girāñ

zindagī be-dar-o-dīvār makāñ hai koī
kab se ik hasrat-e-tāmīr liye baiThe haiñ

jise zamāna kahe iztirāb kā aalam
vo zindagī kā sahārā nahīñ to kuchh bhī nahīñ

ye saaf zāhir hai zindagī meñ sukūñ kī hogī na koī sūrat
kahīñ ḳhizāñ kī ijāra-dārī kahīñ fareb-e-bahār hogā

be-qarārī sī be-qarārī hai
ab yahī zindagī hamārī hai

pyaar hai mujh ko zindagī se bahut
aur tū zindagī se pyārī hai

mohabbat zindagī hai apnī 'ahsan'
yahī sab ko batānā chāhtā huuñ

bajā hai zindagī se ham bahut rahe nārāz
magar batāo ḳhafā tum se bhī kabhū hue haiñ

jis taraf nazar kiije vahshatoñ kā sāmāñ hai
zindagī hī kyā ab to ḳhvāb tak pareshāñ hai

ye us sitamgar se koī kah de marīz-e-furqat kī ab ḳhabar le
haiñ kaT rahī zindagī kī ghaḌiyāñ kahāñ kā din māh-o-sāl kaisā

kaisā makān sāya-e-dīvār bhī nahīñ
jiite haiñ zindagī se magar pyaar bhī nahīñ

zindagī hai chashm-e-ibrat meñ abhī
kuchh nahīñ to aish-o-ishrat hī sahī

ai ajal kuchh zindagī kā haq bhī hai
zindagī terī amānat hī sahī

kabhī be-niyāz-e-maḳhzan kabhī dushman-e-kinārā
kahīñ tujh ko le na Duube tirī zindagī kā dhārā

zindagī un pe naaz kartī hai
jo bhī hālāt par nahīñ rote

har zarra āshiyāna-e-dil hai kahīñ Thahar
sahrā-e-zindagī meñ talāsh-e-diyār kyā

sadiyoñ kā zahr pī ke jo so.e vo kyā uThe
Dastī hai zindagī kī ḳhalish bār-bār kyā

māmūr hai nashāt-e-ġham-e-dil se zindagī
tujh ko 'shamīm' fikr-e-ġham-e-rozgār kyā

ham añdheroñ ke havārī ban ke zinda haiñ magar
zindagī sharmindagī hai raushnī ai raushnī

zindagī aur haiñ kitne tire chehre ye batā
tujh se ik umr kī hālāñki shanāsā.ī hai