Tags-Zindagi

haa.e vo zindagī kī ik saa.at
jo tirī bārgāh meñ guzrī

ik aane kā hai ik jaane kā hañgām
ye qissa zindagī kā do-ghaḌī hai

zindagī kis qadar āsān huā kartī thī
log jab sāhab-e-kirdār huā karte the

zindagī kā safar ḳhatm hotā rahā tum mujhe dam-ba-dam yaad aate rahe
merī vīrān palkoñ pe din Dhalte hī kuchh sitāre magar jagmagāte rahe

luT ga.ī zindagī bujh ga.e diip bhī duur tak phir na baaqī rahī raushnī
is añdhere meñ bhī ham tirī yaad se apnī vīrān mahfil sajāte rahe

yuuñ na koī jiye jis tarah ham jiye zindagī bhar kisī ko na apnā sake
bevafā.ī mirā dil jalātī rahī pyaar ke naam par choT khāte rahe

na dekhī kabhī ham ne gulshan kī sūrat
taraste rahe zindagī bhar qafas meñ

lafz apnī jagah se aage nikal jaate haiñ
aur zindagī kā nizām toḌ dete haiñ

tum hī batlā do ki koī kyā kare
zindagī jab bojh ban jaa.e bahut

ijāzat ho to maiñ tasdīq kar luuñ terī zulfoñ se
sunā hai zindagī ik ḳhūb-sūrat daam hai saaqī

bichhaḌ ke jaise dobāra bhī aa milā huuñ use
kuchh is adā se mujhe zindagī ne dekhā hai

zindagī dekh le kuchh der tamāshā apnā
TūTtā jaatā hai āvāz se rishta apnā

sab se baḌā fareb hai ḳhud zindagī 'adā'
is hīla-jū ke saath haiñ ham bhī bahāna-sāz

itnā to dil-fareb na thā dām-e-zindagī
le aa.e e'tibār ke sāñche meñ Dhaal kar

vo kahte haiñ ki hañsnā hai dil-e-insāñ kī kamzorī
navā-e-zindagī ko ziist kā mātam samajhte haiñ

banāyā hai ahinsā ko usūl-e-zindagī ham ne
sukūn-e-zindagī kā raaz 'tālib' ham samajhte haiñ

ye jo jhāñktī hai nafas nafas koī mauj-e-ḳhūñ sī uThī huī
bane zindagī kī na qatl-gah kahīñ vahshatoñ kī talāsh meñ

jiinā hai ek shaġhl so karte rahe haiñ ham
hai zindagī gavāh ki marte rahe haiñ ham

tum apne qasboñ meñ jā ke dekho vahāñ bhī ab shahr hī base haiñ
ki DhūñDhte ho jo zindagī tum vo zindagī ab kahīñ nahīñ hai

maiñ rizq-e-ḳhvāb ho ke bhī usī ḳhayāl meñ rahā
vo kaun hai jo zindagī ke imtihān meñ nahīñ