Tags-Zindagi

hamārī aur tumhārī zindagī meñ farq hī kyā hai
vahī bāteñ tumhārī haiñ vahī qisse hamāre haiñ

ibārat hai unhīñ se dāstān-e-zindagī 'muztar'
kisī kī yaad meñ jo zindagī ke din guzāre haiñ

zindagī bhar ye balā pīchhā na chhoḌegī mirā
aaj jā.egī to phir aa.egī kal furqat kī raat

ġham-e-zindagī tirī raah meñ shab-e-ārzū tirī chaah meñ
jo ujaḌ gayā vo basā nahīñ jo bichhaḌ gayā vo milā nahīñ

zindagī tū mujhe kis moḌ pe le aa.ī hai
ḳhvāb khulte the jahāñ barf vahāñ chhā.ī hai

zindagī hamesha jab tīrgī kī zad meñ ho
sham.a ik jalāne meñ umr biit jaatī hai

maut zindagī meñ kuchh fāsla nahīñ lekin
phir bhī aane jaane meñ umr biit jaatī hai

zindagī ke rāste meñ do-ghaḌī kā saath hai ye
apne man kī maiñ bhī kah luuñ apne man kī tū bhī kah le

jaane kab aa ke vo darvāze pe dastak de de
zindagī maut kī aahaT se Darī rahtī hai

jo terī afshāñ sañvāreñ zindagī ai zindagī
roz-o-shab aise guzāreñ zindagī ai zindagī

baḌh gayā dariyā kā paanī kaf uḌātā mauj mauj
uḌ ga.iiñ kūñjoñ kī Dāreñ zindagī ai zindagī

har taraf chhāyā huā hai ik sukūt-e-bekarāñ
phir bhī ham tujh ko pukāreñ zindagī ai zindagī

terī sūrat par gumān-e-dasht-o-sahrā haa.e haa.e
tere qadmoñ meñ bahāreñ zindagī ai zindagī

sar uThā.eñ daar par yādeñ sar-e-maqtal sadā
naqsh tere hī ubhāreñ zindagī ai zindagī

jin ke hoñToñ par sadā rahte haiñ tere zamzame
un ke sīnoñ meñ kaTāreñ zindagī ai zindagī

shahr hai āḳhir ye koī sard vīrāna nahīñ
jiine vaale dam na māreñ zindagī ai zindagī

deñ jo tujh ko fursat yak do nafas kī tohmateñ
un se bhī ham log hāreñ zindagī ai zindagī

duur tak miltā na ho nām-o-nishāñ terā jahāñ
ham vahāñ dāman pasāreñ zindagī ai zindagī

vo nahīñ miltā ek baar hameñ
aur ye zindagī dobārā nahīñ

dariyā-e-zindagī ki nigāhoñ kā hai qusūr
Thahrā dikhā.ī de kabhī chaltā dikhā.ī de