Tags-Zindagi

sājhe tyauhār haiñ holī ho ki īd-e-qurbāñ
zindagī kitnī dil-āvez-o-dil-ārā hai yahāñ

nikhrā nikhrā na.ī saj-dhaj kā hai andāz-e-bayāñ
zindagī kitnī dil-āvez-o-dil-ārā hai yahāñ

qaa.em 'azīm' us kī razā se hai zindagī
is meñ mirī razā bhī zarūrī nahīñ ki ho

aaj uThe jaate haiñ darbāñ kī jafā se lekin
zindagī bhar kahīñ chhuTtā hai dar-e-ḳhāna-e-dost

paate haiñ kuchh kamī sī tasvīr-e-zindagī meñ
kyā naqsh chhoḌ aa.e ham dasht-e-be-ḳhudī meñ

nafs kī āmad-o-shud par bhī iḳhtiyār nahīñ
ye zindagī hai to maqsūd-e-zindagī kyā hai

zindagī jab bhī tirī bazm meñ laatī hai hameñ
ye zamīñ chāñd se behtar nazar aatī hai hameñ

aao aao qarīb se dekho
zindagī āñsuoñ kī vaadī hai

ik roz zindagī ne kiyā thā koī savāl
kyā jaane kab se DhūñD rahe haiñ javāb log

kab mere vāste koī mushkil nahīñ rahī
kab maut zindagī ke muqābil nahīñ rahī

yuuñ merī zindagī hai har ik shai se duur duur
jaise ye kā.enāt meñ shāmil nahīñ rahī

jaise hotī aa.ī hai vaise basar ho jā.egī
zindagī ab muḳhtasar se muḳhtasar ho jā.egī

bahut sair kī bāġh-e-jannat kī ham ne magar kuchh mazā zindagī kā na dekhā
kisī dil meñ dard-e-mohabbat na paayā kisī dil meñ dāġh-e-tamannā na dekhā

us ke baġhair jaise jahannam hai zindagī
maiñ jannat-e-adn meñ bahut der tak rahā

muzhda-e-jannat-e-visāl hai maut
zindagī mahshar-e-judā.ī hai

bahut pahle se un qadmoñ kī aahaT jaan lete haiñ
tujhe ai zindagī ham duur se pahchān lete haiñ

rafīq-e-zindagī thī ab anīs-e-vaqt-e-āḳhir hai
tirā ai maut ham ye dūsrā ehsān lete haiñ

āsūda dil meñ uThne lagā iztirāb kyā
is zindagī meñ ho gayā shāmil shitāb kyā

ab aap ḳhud hī batā.eñ ye zindagī kyā hai
karam bhī us ne kiye haiñ magar sitam jaise

maiñ jī rahā huuñ dil-e-murda le ke siine meñ
ise to maut kaho ye to zindagī na huī