Tags-Zindagi

dar pe har ummīd ke phailā diyā dāmān-e-dil
kaj-kulāh-e-zindagī ne ḳhud ko rusvā kar liyā

zindagī ai zindagī tai ho masāfat kis tarah
samt-e-manzil le gayā vo rāsta bhī le gayā

ishq kā e.atibār haiñ ham log
zindagī kā vaqār haiñ ham log

ḳhayāl aayā hai ab rāsta badal leñge
abhī talak to bahut zindagī fuzūl kī hai

āġhāz-e-ġham urūj-e-junūñ intihā-e-shauq
vo zindagī meñ yaad na aa.e kahāñ kahāñ

apne darshan pe ik nigāh-e-karam
vo ġham-e-zindagī kā maarā hai

kabhī shahr shahr ḳhirad phirī kabhī dasht dasht junūñ gayā
mirī zindagī mujhe kuchh batā tujhe kyā milā mujhe kyā milā

nā-murādī hī likhī thī so vo puurī ho ga.ī
zindagī jal kar bujhī aur raakh jaisī ho ga.ī

ye zindagī kī raat hai tārīk kis qadar
donoñ siroñ pe sham.a jalāo nashe meñ aao

jiye jaatā huuñ is sharmindagī meñ
mujhe marnā hai aisī zindagī meñ

zindagī-bhar meñ koī sher to aisā hotā
maiñ bhī kahtā jo mirā zaḳhm-e-darūñ hai yuuñ hai

zindagī talḳh haqīqat kī hai andhī sī galī
apnī āñkhoñ meñ jalāte raho sapnoñ ke charāġh

tai mujh se zindagī kā kahāñ fāsla huā
hai merā ġham ke phuul se dāman bharā huā

mauja-e-gard-e-rah uThā hāsil-e-zindagī lagā
qāfila-e-hayāt kī sa.ī se āshnā huuñ maiñ

ġham-o-karb-o-alam se duur apnī zindagī kyuuñ ho
yahī jiine kā sāmāñ haiñ to phir in meñ kamī kyuuñ ho

mujhe tujh se shikāyat bhī hai lekin ye bhī sach hai
tujhe ai zindagī maiñ vālihāna chāhtā huuñ

zindagī jaltā huā ek diyā hai 'anjum'
dekhnā ye hai kahāñ jā ke bujhātī hai havā

milne mujhe bhī aa.ī thī ik shām-e-zindagī
mujh se lipaT ke roī thī lāchār dekh kar

sarsarāhaT dard kī riste hue zaḳhmoñ kī guuñj
zindagī meñ Dhal ga.ī hai fikr ke lamhoñ kī guuñj

kaun batlā.egā mujh ko kise jā kar pūchhūñ
zindagī qahr ke sāñchoñ meñ Dhalegī kab tak