Tags-Zindagi

zindagī naġhma-e-dil-kash hai magar ai nādāñ
tū ne sīkhā hī nahīñ āh-o-fuġhāñ ke aage

dekh raftār-e-zindagī 'rūhī'
ruk ga.ī gaaḌī ek jhaTke se

chalā thā DhūñDne maiñ zindagī kī buniyādeñ
pata na thā ki ḳhud apnā pata na pā.ūñgā

zindagī bhar ham lab-e-dariyā rahe
aur sarāboñ kī tarah tishna rahe

ek maiñ apnī hī zindagī kā bharam
apnī hī maut par nauha-ḳhvāñ ek maiñ

tujhe zindagī kahā hai tū hai zindagī kā hāsil
tujhe bevafā kahā to mujhe log kyā kaheñge

mire qarīb se guzrā ik ajnabī kī tarah
vo kaj-adā jo milā bhī to zindagī kī tarah

jism kā jas ruup kā ras kaam kā kas
zindagī kī ye suhānī dhuup bahlātī rahī hai mere man ko

mahz bekār na samjheñ mujhe duniyā vaale
zindagī hai to koī kaam bhī kar jā.ūñgā

muddatoñ khelī haiñ mujh se ġham kī bedard uñgliyāñ
maiñ rabāb-e-zindagī kā ik shikasta taar huuñ

charāġh-e-kushta le kar ham tirī mahfil meñ kyā aate
jo din the zindagī ke vo to raste meñ guzār aa.e

khulā makān hai har ek zindagī 'āzar'
havā ke saath darīchoñ se ḳhvāb aate haiñ

unheñ bharosa do zindagī kā jinheñ mohabbat hai zindagī se
ajal ke ham naqsh-e-pā pe chal kar fanā kī had se guzar rahe haiñ

ye zindagī kā ufuq bhī ajab ufuq hai 'zamīr'
ki har ḳhayāl sitāra banā ġhubār huā

taḳhlīq-e-kul ke lamha-e-avval meñ ai 'asar'
maiñ zindagī kī pahlī humak pahlī jast thā

tum kyā ga.e ki zindagī be-kaif ho ga.ī
jab tak ki tum qarīb rahe be-ḳhudī rahī

thā ik hujūm-e-yās jo baḌhtā gayā 'nadīm'
mahrūm-e-imbisāt mirī zindagī rahī

balā kaafī na thī ik zindagī kī
dobāra yaad farmāyā gayā huuñ

masarrat zindagī kā dūsrā naam
masarrat kī tamannā mustaqil ġham

sho.ala-ḳhez-o-sho.ala-var ab har rah-e-tadbīr hai
zindagī goyā chitā kī boltī tasvīr hai