Tags-Zindagi

āshiyāñ kī zindagī se ho chalā hai dil uchāT
phir vahī shauq-e-shahādat dil kā dāman-gīr hai

ye jalva-e-hā-e-bū-qalmūñ be-sabāt haiñ
hai zindagī tilism-e-jahāñ ik fasāna hai

zindagī ek sulagtī sī chitā hai 'sāhir'
sho.ala bantī hai na ye bujh ke dhuāñ hotī hai

ārzūeñ jal ga.iiñ shauq-e-farāvāñ jal gayā
bujh gayā dil zindagī kā sāz-o-sāmāñ jal gayā

zindagī bhar rahegī mujhe yaad vo
ishq meñ jo mirī āzmā.ish huī

kiran phūTī ufuq par āftāb-e-sub.h-e-mahshar kī
sunā.e jaao apnī dāstān-e-zindagī kab tak

kabhī to zindagī ḳhud bhī ilāj-e-zindagī kartī
ajal kartī rahe darmān-e-dard-e-zindagī kab tak

tum se mil ke
zindagī achchhī lagī

muḳhtasar vaqt hai par bāteñ kar
zindagī beach safar bāteñ kar

zindagī raqs meñ hai merī jaañ
baiTh jā shor na kar bāteñ kar

us anjuman meñ ki chashm-e-sāqī kafīl ho aish-e-zindagī kī
vo bāda-ḳhvārī meñ ḳhaam hoñge jo fikr-e-jām-o-subū kareñge

jāgte hī nazar aḳhbār meñ kho jaatī hai
zindagī dard ke ambār meñ kho jaatī hai

nashsha thā zindagī kā sharāboñ se tez-tar
ham gir paḌe to maut uThā le ga.ī hameñ

itne Duube hue the jiine meñ
muddatoñ zindagī ko samjhā nahīñ

dhuup kī mānind hai ye zindagī 'tāriq' mujhe
dhuup ke dālān meñ vo aanā jaanā yaad hai

kaḌak kar bijliyāñ rah jā.eñgī chhaT jā.eñge bādal
rahegā zindagī ban kar sukūn-e-āshiyāñ merī

'falak' maiñ sar-zamīn-e-'dāġh'-o-'ġhālib' kā huuñ ik zarra
vatan hai shahr-e-dehlī zindagī urdu zabāñ merī

kab tak raheñge sāhil-o-tūfāñ ke darmiyāñ
kab tak ye zindagī hameñ zindāñ dikhā.ī de

hosh vāloñ ko ḳhabar kyā be-ḳhudī kyā chiiz hai
ishq kiije phir samajhiye zindagī kyā chiiz hai

ehsās par muhīt the lafzoñ ke dā.ere
lafzoñ ke dā.eroñ meñ magar zindagī to thī