Tags-Zindagi

kahāniyoñ kā ruup de ke ham jinheñ sunā sakeñ
hamārī zindagī meñ aise vāqi.āt hī nahīñ

liyā hai kis qadar saḳhtī se apnā imtihāñ ham ne
ki ik talvār rakh dī zindagī ke darmiyāñ ham ne

vafā ke naam par pairā kiye kachche ghaḌe le kar
Duboyā zindagī ko dāstāñ-dar-dāstāñ ham ne

sadiyoñ kā ġham simaT ke diloñ meñ utar gayā
ham log zindagī ke gunahgār ho ga.e

hameñ apne ilāqoñ se mohabbat ho nahīñ paa.ī
vagarna zindagī ko aur bhī behtar banā lete

ham na tanhā us galī se jaañ ko kho kar uTh ga.e
saikḌoñ yaañ zindagī se haath dho kar uTh ga.e

un kī yaad un kī tamannā un kā ġham
kaT rahī hai zindagī ārām se

ham ne jab hañs kar kahā mamnūn haiñ
zindagī jaise pashemāñ ho ga.ī

ek talvār hai talvār bhī do dhārī hai
zindagī phuul hai patthar se magar bhārī hai

fanā ke ba.ad hī miltī hai zindagī ko davā
'talab' ye ramz tumhārī samajh meñ aatā hai kyā

zindagī chhoḌ ne aa.ī mujhe darvāze tak
raat ke pichhle pahar maiñ jo kabhī ghar aayā

na to ilm apne meñ hai yahāñ ki ḳhudā ne bhejā hai kis liye
isī ko jo kahte haiñ zindagī so to jism ke hai azaab meñ

us ke va.ade ke evaz de Daalī apnī zindagī
ek sastī shai kā ūñche bhaav saudā kar liyā

jaisī milī hai vaisī guzārī hai zindagī
ham ne kahīñ bhī jhūTā dikhāvā nahīñ kiyā

zindagī dhuup kā maidān banī baiThī hai
apnā saaya bhī gurezāñ, tirā dāmāñ bhī ḳhafā

na itminān se baiTho na gahrī niind so paao
miyāñ is muḳhtasar sī zindagī se chāhte kyā ho

bahut sambhal ke guzar zindagī ke lamhoñ se
na jaane gir paḌe kab ret kā makāñ chup hai

zamāna bhī mujh se nā-muvāfiq maiñ aap bhī dushman-e-salāmat
ta.ajjub is kā hai bojh kyūñkar maiñ zindagī kā uThā rahā huuñ

kiyā hai yaad us ne aaj shāyad
mizāj-e-zindagī barham nahīñ hai

zindagī jā na sakī shām-o-sahar se aage
saarā aalam isī ā.īna-e-takrār meñ thā