Tags-Zindagi

bad-nasībī na pūchhiye 'shāhīn'
zindagī sho.ala-bār lagtī hai

chāhat meñ un kī biit ga.ī zindagī 'samad'
ḳhud ko bhī pyaar kījiye ḳhud ko bhī chāhiye

mire ḳhudā mujhe thoḌī sī zindagī de de
udaas mere janāze se jā rahā hai koī

ḳharīdāroñ meñ rah kar zindagī vo bik bhī jaate haiñ
tire bāzār meñ jo log hushyārī nahīñ rakhte

mujh pe ehsāñ hai mirī tesha-ba-kaf sāñsoñ kā
zindagī tujh ko pahāḌoñ kī tarah kaaTā hai

bīm-o-rajā meñ qaid har ik māh-o-sāl hai
jaise ye zindagī bhī koī yarġhamāl hai

na vo maiñ rahā na vo tū rahā na vo aarzū na vo mudda.ā
huā zindagī kā bhī faisla magar ek terā rahā qalaq

kisī lamhe to ḳhud se lā-ta.alluq bhī raho logo
masā.il kam nahīñ phir zindagī bhar sochte rahnā

ahl-e-ishq kī hastī kyā ajiib hastī hai
marg-e-nā-gahānī ko zindagī tarastī hai

ham ne ishq-o-ulfat meñ vo fareb khaa.e haiñ
jin kī dil-farebī ko zindagī tarastī hai

zindagī bach nikaltī hai har jañg meñ vaqt ke vaar se
phir Tapaktā hai ik baar lamhoñ kā ḳhuuñ saañs kī dhaar se

zaḳhm-e-sar ke dīvāne zaḳhm-e-dil kā qaa.il ho
zindagī sañvartī hai dil pe choT khāne se

aa tire sañg zarā peñg baḌhā.ī jaa.e
zindagī baiTh tujhe chaa.e pilā.ī jaa.e

zindagī ke dukh azal se zindagī ke saath haiñ
log faanī haiñ magar logoñ ke dukh faanī nahīñ

zindagī bhar sirf use puujā magar ghar baiTh kar
pāsdārān-e-vafā kā kaam darbānī nahīñ

kise ḳhabar thī ki ālām-e-zindagī 'maikash'
ḳhumār-e-bāda-e-ishrat utaar bhī deñge

zindagī jaltī hai kitnī dozaḳhoñ kī aag meñ
chār-dīvāroñ kī ik jannat banāne ke liye

nafrateñ be-zāriyāñ buġhz-o-ta.assub dushmanī
zindagī kā bas yahī ma.amūl ho jaa.e to phir

'safīr' ik ḳhvāb thī ye chand roza zindagī apnī
ajal se mil ga.ī ta.abīr is ḳhvāb-e-pareshāñ kī

dukhoñ se aur ġhamoñ se dostī hai
haqīqat meñ yahī to zindagī hai