Tags-Zindagi

purānī qabroñ pe aaj kitne na.e makānoñ kī zindagī hai
jo aaj hai bas usī ko dekho vo bhuul jaao jo kal rahā hai

zindagī vaqt kī dīvāroñ meñ mahbūs rahī
koī parda na uThā shām-o-sahar se aage

kyuuñ jhuk ga.ī hai bojh se tū āsmān ke
ab sar uThā ai zindagī chāTegī kitnī ḳhaak

chimaT jaa.e jo jism se maut se lamha pahle
jise roknā ġhair-mumkin ho vo zindagī hai

muskurātā huā maqtal se guzar aayā huuñ
zindagī terī koī ḳhaas adā hai mujh meñ

ishq kī tund-ḳhezī ke auqāt āḳhir hue
ai mubāraz-talab zindagī

ai mubāraz-talab zindagī
din bhī Dhal hī gayā

gardish-e-ġham tamām ho ki na ho
zindagī shād-kām ho ki na ho

zindagī meñ hī naam paidā kar
baad marne ke naam ho ki na ho

maiñ ne jab se chāhat ke jugnuoñ ko paalā hai
zindagī kī vaadī meñ har taraf ujālā hai

naaz kyā kare 'dildār' aatī jaatī sāñsoñ par
zindagī jab insāñ kī maut kā nivāla hai

aao zindagī zindagī kheleñ
ye jhuuT hai ki maiñ tumhāre liye chāñd toḌ ke lā saktā huuñ

zindagī kā safar hī aisā hai
dam-ba-dam gaam gaam piitā huuñ

kareñ kyā zindagī qurbān us par
rahā jo ziist kā hāsil nahīñ ab

zindagī ko nāginoñ kī tarah Dastī goliyāñ
zahr baḌhtā phailtā andar hī andar duur tak

zindagī meñ na maiñ ne phal paayā
ho na mere sar-e-mazār daraḳht

jab nahīñ kuchh e'tibār-e-zindagī
is jahāñ kā shaad kyā nāshād kyā

zindagī bevafā azal se hai
phir bhī lagtī hai bā-vafā sī kyuuñ

mujhe zindagī se ḳhirāj hī nahīñ mil rahā
abhī us se merā mizāj hī nahīñ mil rahā

zindagī tak mirī hañs lījiye aap
phir mujhe roiyegā mere ba.ad