Tags-Zindagi

kuchh is tarah se guzārī hai zindagī maiñ ne
har ek saañs ko samjhā hai āḳhirī maiñ ne

ye zindagī kī ne.amat kis ko nahīñ hai pyārī
mat pūchh is se ham kyuuñ bezār ho ga.e haiñ

likhe haiñ ashkoñ se lamhāt-e-zindagī 'ūshā'
unheñ kitāb-e-mohabbat meñ tum sajā denā

nafas nafas zindagī ke ho kar ajal kī tash.hīr kar rahe haiñ
ye kis jatan meñ lage haiñ ham sab kise jahāñgīr kar rahe haiñ

takmīl ho rahī hai bichhaḌne ke bāvajūd
baaqī kī zindagī bhī kahānī usī kī hai

ye zindagī bhī mire hausloñ pe hairāñ hai
samajh rahī thī ki maiñ us ke Dar meñ aa gayā huuñ

aa.egā vo din hamārī zindagī meñ bhī zarūr
jo añdheroñ ko miTā kar raushnī de jā.egā

lamhoñ kī uñgliyoñ pe sabhī nāchne lage
ye jashn-e-zindagī kī banāvaT hai dosto

mujhe bas ek lamha sochne do zindagī bhar
kise paane kī ḳhātir maiñ kise khotā rahūñgā

rābta dil kā dil se hai kaafī mujhe
nuur hī nuur meñ zindagī hai abhī

haañ in hasīn ā.ankhoñ meñ raqsāñ hai zindagī
palkoñ kī ho sake to namī bhī nibhā.iye

ye zindagī hameñ kaise muaaf kar detī
vo vaqt vaqt thā ham ne jise ḳharāb kiyā

na aa.ī raas banāvaT kī zindagī mujh ko
maiñ shahr chhoḌ ke phir aa gayā huuñ gaañv meñ

numūd-e-zindagī vahī ḳhurūsh-o-hamhama vahī
ujaḌ ga.e makāñ to kyā badal ga.e makīñ to kyā

maiñ zindagī kī duā māñgne lagā huuñ bahut
jo ho sake to duāoñ ko be-asar kar de

duā.eñ māñgtā huuñ sab kī zindagī ke liye
aur apnī maut kā sāmān karne vaalā huuñ

kuchh aur tarah kī mushkil meñ Dālne ke liye
maiñ apnī zindagī āsān karne vaalā huuñ

bahut dushvār hai ḳhuddār rah kar zindagī karnā
ḳhushāmad karne vaalā sadqa-e-dastār kyā detā

zindagī ke kaThin jañgaloñ meñ mirā
har qadam rāhbar pāsbāñ ḳhvāb hai

duniyā merī zindagī ke din kam kartī jaatī hai kyuuñ
ḳhuun pasīna ek kiyā hai ye merī mazdūrī hai