Tags-Zindagi

ik shaam ham-suḳhan the chaman meñ kalī se ham
yādash-ba-ḳhair phir na mile zindagī se ham

taklīf-e-iltifāt na kar ai nigāh-e-nāz
ab mutma.in haiñ apne ġham-e-zindagī se ham

zindagī se yahī gila hai mujhe
tū bahut der se milā hai mujhe

is ek hī zindagī meñ kitne janam liye baar baar ham ne
aur ab ye roz jaan de de ke kyuuñ jiye baiThe sochte haiñ

jab maiñ us aadmī se duur huā
ġham mirī zindagī se duur huā

jī lagā rakkhā hai yuuñ ta.abīr ke auhām se
zindagī kyā hai miyāñ bas ek ghar ḳhvāboñ kā hai

jigar meñ Tiis lab hañsne pe majbūr
kuchh aisī hī hamārī zindagī hai

ham natīje ke liye tā-zindagī baiThe rahe
ye kahāñ samjhe ki pahle imtihāñ honā hī thā

zindagī tujh se pyaar kyā karte
tujh pe ham jaañ nisār kyā karte

vo ghaḌī ham ne jo jiyā hī nahīñ
zindagī meñ shumār kyā karte

jiine kā ban gayā hai imkān zindagī meñ
tum aa ga.e hamārī vīrān zindagī meñ

har rāsta hai ab to āsān zindagī meñ
shāmil huā hai jab se qur.ān zindagī meñ

marne ke ba.ad is kī mohlat nahīñ milegī
kar āḳhirat kā pyāre sāmān zindagī meñ

phir mil sakī na us ko jā-e-panāh koī
jis ne bhī kho diye haiñ ausān zindagī meñ

ye kah ke apne dil ko dete haiñ ham tasallī
puure hue haiñ kis ke armān zindagī meñ

kuchh aise log bhī haiñ duniyā meñ terī yā-rab
lete nahīñ kisī kā ehsān zindagī meñ

aadat sī ban ga.ī hai ab to hanīf-'rāhī'
jhele haiñ jaane kitne tūfān zindagī meñ

shyām gokul na jaanā ki rādhā kā jī ab na bansī kī tānoñ pe lahrā.egā
kis ko fursat ġham-e-zindagī se yahāñ kaun be-vaqt ke raag sun pā.egā

umr-e-ḳhizr ke andāz har nafas meñ paatā huuñ
zindagī na.ī paa.ī aap se judā ho kar

kī qazā-e-mubram ne zindagī kī ġham-ḳhvārī
dard kī davā pahuñchī dard be-davā ho kar