Tags-Zindagi

sarḳhushī ban na sakī zahr-e-alam kā tiryāk
zindagī talḳhī-e-hālāt se aage na baḌhī

shabāb-e-dard mirī zindagī kī sub.h sahī
piyūñ sharāb yahāñ tak ki shaam ho jaa.e

vo ek din hī mirī zindagī kā hāsil hai
ki mere paas koī ruk gayā thā bārish meñ

zindagī sīdhī sī ik raah nahīñ hai ai dost
is meñ jo moḌ haiñ vo tū ne kahāñ dekhe haiñ

dekhī nahīñ hai tū ne kabhī zindagī kī lahr
achchhā to jā 'adam' kī surāhī uThā ke lā

hai mumkin zindagī aa.e samajh ab
dobāra sar khapā kar dekhte haiñ

ye zindagī kā bayābāñ agar ijāzat de
zarā sī dhuup uThā luuñ yahāñ Thaharte hue

sūrat dikhā ke ḳhvāb meñ ik aan ke liye
ye kaun zindagī ke hasīñ ḳhvāb le gayā

ahl-e-duniyā dekhte haiñ kitnī hairānī ke saath
zindagī ham ne basar kar lī hai nādānī ke saath

ek lamhe ke liye bhī ḳhud se ham na mil sake
zindagī thī shahr vāloñ ko dikhāne ke liye

mujh se ābād hai jo tanhā.ī
zindagī kā siñghār hai mire dost

is ke andar zindagī kī qadr karte ho talāsh
aur liye phirtā hai bhaa.ī dūsre bhaa.ī kī laash

bhulā na de ye zamāna tum ko qadīm qabl-e-masīh kah kar
ki zindagī kī kahāniyoñ meñ koī haqīqat kā baab rakhnā

zindagī kā dard le kar inqalāb aayā to kyā
ek doshīza pe ġhurbat meñ shabāb aayā to kyā

tishna-e-anvār hai ab tak urūs-e-zindagī
bādaloñ kī pālkī meñ āftāb aayā to kyā

ab aisī zindagī se maut aa jaatī to behtar thā
huī taz.hīk apnī dāstān-e-dil bayāñ kar ke

bhulā diyā mujhe tū ne tujhe maiñ kho baiThā
na maiñ tirā huā ai zindagī na tū merī

jab sisaktī reñgtī sī zindagī dekhī kahīñ
phir ḳhudā kī dī huī sab nemateñ achchhī lagīñ

zindagī tū ne kahānī de dī
bātoñ bātoñ meñ nishānī de dī

chalī ga.ī hai tire saath zindagī 'jāved'
maiñ ho gayā huuñ tire ba.ad kis qadar tanhā