Tags-Zindagi

falsafa ho zindagī kā bas yahī
ġham kamāo to uḌāne ke liye

bajā.e ḳhuuñ mai jhalak rahī hai hamārī rag rag se ab to saaqī
bahut hī be-kaif zindagī thī ḳhumār-āgīñ nazar se pahle

zindagī kī hañsī uḌātī huī
ḳhvāhish-e-marg sar uThātī huī

mujh se kahtī haiñ vo udaas āñhkeñ
zindagī bhar kī sab thakan yaañ hai

thamā jab zindagī kā josh parḳhāsh-e-ajal jaagī
amal ko dekh kar mad.hosh pādāsh-e-amal jaagī

tum mil ga.e to koī gila ab nahīñ rahā
maiñ apnī zindagī se ḳhafā ab nahīñ rahā

zindagī kaT rahī hai saa.e meñ
dhuup aatī hai lauT jaatī hai

zindagī hai mirī Thahrā huā paanī jaise
ek kañkar se bhī ho jaatī hai halchal mujh meñ

tumheñ aziiz nahīñ hai to ho aziiz kise
na mil sakegā koī vajh-e-zindagī ban kar

lipaT ke so gayā maiñ zindagī se
ġhazab-nākī ināyat kī tarah thī

zindagī hogī mirī ai ġham-e-daurāñ ik roz
maiñ sañvāruñgā tirī zulf-e-pareshāñ ik roz

zindagī merī mujhe qaid kiye detī hai
is ko Dar hai maiñ kisī aur kā ho saktā huuñ

hasīñ zindagī kī talāsh thī hameñ sarḳhushī kī talāsh thī
hue zindagī se jo āshnā to jarāhatoñ se bahal ga.e

tire sogvāroñ kī zindagī kabhī mutma.in na guzar sakī
jo bujhī kabhī koī tishnagī ka.ī aur dard machal ga.e

silvaTeñ haiñ mire chehre pe to hairat kyuuñ hai
zindagī ne mujhe kuchh tum se ziyāda pahnā

marne kā koī ḳhauf na jiine kī aarzū
kyā zindagī davām se aage nikal ga.ī

zindagī gum na dostī gum hai
ye haqīqat hai aadmī gum hai

tujh se parda nahīñ mire ġham kā
tū mirī zindagī kā mahram hai

haa.e kis aalam meñ chhoḌā hai tumhāre ġham ne saath
jab qazā bhī zindagī kī chāra-gar hotī nahīñ

fikr pābandī-e-hālāt se aage na baḌhī
zindagī qaid-e-maqāmāt se aage na baḌhī