Tags-Zulf

maiñ giraftār-e-vafā huuñ chhuT ke jā.ūñgā kahāñ
baal bāñdhā chor huuñ har tār-e-zulf-e-yār kā

ham ko chheḌā to machal jā.eñge armāñ kī tarah
ham pareshāñ haiñ tirī zulf-e-pareshāñ kī tarah

dil meñ jo tasavvur hai tirī zulf-e-rasā kā
samjhā huuñ ise maiñ to amal radd-e-balā kā

huā kaun sā roz-e-raushan na kaalā
kab afsāna-e-zulf-e-shabgūñ na niklā

zulf thī jo bikhar ga.ī ruḳh thā ki jo nikhar gayā
haa.e vo shaam ab kahāñ haa.e vo ab sahar kahāñ

vaqt aayā to ḳhuun se apne dāġh-e-nadāmat dho leñge
sāya-e-zulf meñ jāgne vaale sāya-e-dār meñ so leñge

haiñ dīdanī banafsha o sumbul ke pech o taab
naqsha khīñchā huā hai ḳhat-o-zulf-e-yār kā

jo dekh legā tumheñ koī manchalā mausam
tumhārī zulf se kaalī ghaTā banā degā

mahak hai tere shabistāñ kī bū-e-zulf-e-sabā
chalī hai bād-e-sabā ik shikasta-pā ke liye

suljhā.īñ jab bhī ziist kī 'sāġhar' ne gutthiyāñ
nāgāh terī zulf ke ḳham yaad aa ga.e

mere siine meñ idhar zulf-e-muattar kā hujūm
aah vo zulf ki āvāra ḳharābāt kī raat

halqa halqa ghar banā laḳht-e-dil-e-betāb kā
zulf-e-jānāñ meñ hai aalam sub.ha-e-sīmāb kā

milegā zulf-e-āzādī unheñ kyā mausam-e-gul meñ
qafas se chhūT kar gulshan meñ jo be-bāl-o-par aa.e

tumhārī zulf ko suljhā.eñge vo dīvāne
jo apne chāk-e-garebāñ kā ġham nahīñ karte

sub.h-e-hayāt le le ai zulf-e-yār lekin
maiñ tujh se is ke badle ik shaam chāhtā huuñ

zulf-e-shab-rañg-o-chashm-e-sehr-andāz
ye bahut kuchh haiñ par yahī to nahīñ

muñh khole to roz hai raushan zulf bikhere raat hai phir
in tauroñ se āshiq kyūñ-kar sub.h ko apnī shaam kareñ

kaun sī shaam nahīñ sub.h huī ai maġhrūr
ek din hotī hai ye zulf-e-siyah-fām safed

bast-e-zulf-e-musalsal hai ye dil sūrat-garo
donoñ jānib us ke do zanjīr khīñchā chāhiye

saude meñ tirī zulf ke likhte haiñ jo ash.ār
hotā hai siyah nāma-e-a.amāl hamārā