Tags-Zulf

ai zulf us ke muñh se tū to lipaT rahī hai
gesū ko kāTiyo mat vo aap kaT rahī hai

tire kūcha-e-zulf meñ dil hai mirā ab use maiñ samajhtā huuñ dām-e-balā
ye ajiib sitam hai ajiib jafā ki yahāñ na rahe to kahīñ na rahe

le lījiye mirā dil-e-sad-chāk muft hai
shāna barā.e-zulf-e-pareshāñ ḳharīdiye

ek din zulf ke muñh par na chaḌhī ye kāfir
yād-e-kākul ko faqat sheva-e-jāsūsī hai

qarār o tāqat o sabr o ḳhirad hue sab gum
tumhārī zulf meñ abtar hai haal kyā dil kā

latāfat gulbun-e-husn jahāñ-ārā samajh ai dil
huā hai zulf aur ruḳhsār-e-jānāñ āshiyāñ merā

na sumbul hai na kaalā hai na nāgin
tarī zulf-e-rasā kyā jaane kyā hai

ridā-e-zulf meñ guzrī thī ik shab
magar āñkhoñ meñ ab tak niiñd sī hai

paḌ ga.ī paañv meñ taqdīr kī zanjīr to kyā
ham to us ko bhī tirī zulf kā bal kahte haiñ

jo aa kar ḳhvāb meñ bhī zehn-o-dil par chhā hī jaatā hai
vo zulf-e-mushkbū se qasr-e-dil mahkā hī jaatā hai

dil pā ke us kī zulf meñ ārām rah gayā
darvesh jis jagah ki huī shaam rah gayā

kis kī ham-āġhoshī kā thā azm jo
zulf tirī tauq-e-kamar ho ga.ī

zulf kholo to ghanī chhāñv maiñ kuchh sustā leñ
do-ghaḌī ke liye saa.e meñ Thahar jaate haiñ

dekh ke uljhan zulf-e-dotā kī kaise ulajh paḌte haiñ havā se
ham se sīkho ham ko hai yaaro fikr-e-nigārāñ tum se ziyāda

zulf zanjīr-e-pā huī jab se
ham asīr-e-ma.āsh haiñ tab se

khul ga.e us kī zulf ke dekhe
pech-e-dastār-e-zāhid-e-makkār

aa.ina dīda-e-hairāñ tujhe dikhlā.egā
shāna-e-zulf mirā hāl-e-pareshāñ hogā

mast āñkhoñ pe bikhar jaatī hai jab zulf 'jalīl'
maiñ samajhtā huuñ ghaTā chhā.ī hai mai-ḳhānoñ par

niiñd aa.ī jo kabhī zulf ke dīvāne ko
chauñk uThā ḳhvāb-e-pareshāñ se pareshāñ ho kar

ḳhāl-e-āriz dekh lo halqe meñ zulf-e-yār ke
mār-e-mohra gar na dekhā ho dahan meñ maar ke