Tags-Zulf

kisī kī zulf-e-shikan-dar-shikan kī baat huī
hamāre vāste dār-o-rasan kī baat huī

'bedār' zulf khīñche idhar chashm-e-yār udhar
hairāñ hai dil kahāñ na rahe kis ke haañ rahe

mujhe zabt-e-ġham kā na de sabaq zarā apne haal pe kar nazar
mirī uljhanoñ ke ḳhayāl se tirī zulf bhī to bikhar ga.ī

laa.ī aahū ko daam meñ goyā
aañkh par zulf-e-mushkbū terī

zulf sumbul hai aur kamar rag-e-gul
hai ye tārīf mū-ba-mū terī

jab bhī us zulf-e-pareshāñ kī havā aatī hai
ham to ḳhushbū kī tarah ghar se nikal jaate haiñ

jis kī shamīm-e-zulf pe maiñ ġhash huuñ 'sheftā'
us ne shamīm-e-zulf suñghā.ī tamām shab

vo aah taar o paud ho jis kā havā-e-zulf
kartī hai ambarī o sabā.ī tamām shab

aa tujh ko banā duuñ rashk-e-chaman mīzān-e-mohabbat meñ tul ke
aariz ko guloñ kī ra.anā.ī bal zulf ko baḳhshūñ sumbul ke

aag lagā ke hañs kabhī ban ke ghaTā baras kabhī
bikhrā ke zulf-e-ambarīñ hosh mire uḌaa.e jā

sargoshī kī ruḳhsat na kabhī ġhair ko denā
gar vo havas-e-zulf o banā-gosh meñ mar jaa.e

ai zulf phail phail ke ruḳhsār ko na Dhāñk
kar nīm-roz kī na shah-e-mulk-e-shām hirs

ba.ad muddat mile kuchh kahā na sunā bhar ga.e zaḳhm purvā.iyāñ so ga.iiñ
kañghī kartī huī reshmī zulf meñ merī betāb sī uñgliyāñ so ga.iiñ

kahte haiñ dekh ke zulf us ke ruḳh-e-tābāñ par
kabhī hotā nahīñ us sham.a se gul-gīr judā

kyuuñ na ho jalva-e-ḳhurshed se saa.e kā vajūd
kyā tire chehre se ho zulf-e-girah-gīr judā

yuuñ tirī zulf kī ḳhushbū hai sar-e-shām uḌī
kashtī-e-fikr yam-e-fan meñ ravāñ ho jaise

yaad meñ us kī zulf kī ai dil
kab ta.iiñ pech-o-tāb meñ rahnā

hai aaTh pahar tū jalva-numā timsāl-e-nazar hai partav-e-ruḳh
aariz hai qamar ḳhurshīd jabīñ shab-e-zulf-e-sahar hai partav-e-ruḳh

khulegī zulf se ḳhud dil kī chorī
vo jaadū kyā na jo sar chaḌh ke bole

logo mirī āshufta-sarī par na karo tanz
ilzām utāro koī us zulf ke sar se