Tags-Zulf

ik ruḳhsār pe zulf girī thī
ik ruḳhsār pe chāñd khilā thā

asīr-e-zulf ko shāyad yahīñ rihā.ī hai
pukārtā huuñ jise vo sadā meñ aayā hai

le jā chukī chaman meñ sabā bū-e-zulf-e-yār
sumbul ke silsile ko bhī barham vo mū kareñ

kyā ruḳh badal badal ke mujh āshufta-hāl par
parchhā.iyāñ paḌīñ tirī zulf-e-siyāh kī

ham se vo be-sabab ulajhtī hai
Tuk to samjhāo zulf-e-abtar ko

rakhkhūñ apnā kafan silāne ko
pā.ūñ gar mū-e-zulf kā yak-tār

khol kar zulf-e-ambarīñ yak-bār
rishta-e-shauq kuuñ darāz kare

kyā dekhte haiñ aap jhijak kar sharāb meñ
paidā hai aks-e-zulf-e-mo'ambar sharāb meñ

bikhar chukā huuñ ġham-e-zindagī ke shānoñ par
ab apnī zulf kī sūrat sañvār de mujh ko

zahrāb-e-zamāna pī pī kar jo ahl-e-junūñ the raah lage
shā.er ko 'nushūr' ik zulf-e-dotā ġham de na sakī uljhā hī ga.ī

har sitam karne se pahle ye zarā soch bhī le
maiñ jo bikhrā to tirī zulf bikhar jā.egī

jiite haiñ dekh kar ham zulf-e-siyah ko us kī
afyūniyoñ kī jaise tiryāk zindagī hai

shaan se kuchh bigaḌ ga.ī shāyad
zulf-e-shab-rañg pech-o-tāb meñ hai

pareshāñ-rozgār āshufta-hālāñ kā muqaddar hai
ki us zulf-e-pareshāñ kī pareshānī nahīñ jaatī

chehre se saraktī jaatī hai zulf un kī ḳhvāb ke aalam meñ
vo haiñ ki abhī tak hosh nahīñ aur shab hai ki Dhaltī jaatī hai

zulf terī ne pareshāñ kiyā ai yaar mujhe
terī āñkhoñ ne kiyā aap sā bīmār mujhe

sanam kī zulf ke halqe meñ hai jyuuñ jiim kā nuqta
ajab hai ḳhush-numā us āriz-e-gulgūñ pe ḳhaal us kā

le ke apnī zulf ko vo pyāre pyāre haath meñ
kahte haiñ fitnoñ kī choTī hai hamāre haath meñ

kahtī hai baḌh ke zulf kamar se dam-e-ḳhirām
rakh dūñgī maiñ kamar ke abhī bal nikāl ke

maiñ giraftār-e-vafā huuñ chhuT ke jā.ūñgā kahāñ
baal bāñdhā chor huuñ har tār-e-zulf-e-yār kā