Tags-Zulf

kākul-e-ḳhamdār meñ ḳham aur aate jā.eñge
zulf us kī aur bhī shaitān hotī jā.egī

'shamīm' vo na saath deñ to mujh se tai na ho sakeñ
ye zindagī ke rāste ki zulf-e-ḳham-ba-ḳham kaheñ

un kī āñkhoñ se mire sog meñ aañsū jo gire
zulf bolī ki azā-dār to ham haiñ tum kaun

ġham to ye bhī hai ki taqdīr bhī roī barsoñ
haa.e vo zulf-e-girah-gīr bhī roī barsoñ

firāq-e-zulf meñ roz uTh ke shab ko rotā huuñ
ki sar se gesū-e-shab tā-kamar nahīñ aatā

ḳhudā rakkhe tirī zulf-e-mo.ambar ke tasavvur se
taḳhayyul merā ambar-bīz-o-ambar-fām hai saaqī

zamāne se alag ho kar mujhe duniyā-e-ulfat meñ
tirā ruḳh roz-e-raushan zulf terī shaam hai saaqī

bikhernī hai jise zulf us kā istiqbāl
vabāl-e-shahr se ḳhālī hai ek shāna mirā

tū ne apnī zulf ke saa.e meñ afsāne kahe
mujh ko zanjīreñ milī haiñ jur.at-e-iz.hār par

daur meñ us zulf ke hai bas ki dīvānoñ kī dhuum
suntā huuñ chāroñ taraf se maiñ sadā-e-ġhul ke ġhul

ek hamīñ kyā pech meñ haiñ us zulf-e-dotā kī ulfat se
mār-e-siyah ham-rañg hai apnā sumbul-e-tar bhī shāna bhī

kūcha-gardān-e-junūñ misl-e-sabā
zulf-e-āvāra kī qismat Thahre

vo ḳhat vo chehra vo zulf-e-siyāh to dekho
ki shaam sub.h ke baad aa.e sub.h shaam ke baad

saañp sar maar agar jo jaave mar
na kare zulf ke tirī sar bar

har samt siyāhī hai ghaTā-Top añdherā
kyā zulf-e-dotā aaj vo bikhrā.e hue haiñ

aao be-parda tumheñ jalva-e-pinhāñ kī qasam
ham na chheḌeñge hameñ zulf-e-pareshāñ kī qasam

raah kyā sūjhe mujhe duniyā mirī tārīk hai
hai kisī zulf-e-siyah meñ dil mirā uljhā huā

idhar ye dil hai ki us ko bas ik junūñ kī dhun hai junūñ kī dhun hai
udhar hamārā ye azm-e-paiham ki zulf-e-gītī sañvār aa.eñ

ghuras le tū ab un ko chīre meñ apne
tamāshā-e-zulf-e-dotā kar chuke ham

us kī kyā vaj.h mire hote vahāñ kyuuñ na raheñ
kyuuñ rahe zulf-e-siyah aap ke ruḳhsār ke paas