Tags-Zulf

palkeñ haiñ balā aañkh balā zulf balā hai
kyūñkar na kaheñ sab ki hasīñ tum ho balā ke

ḳhatt-e-āriz se likhā hai zulf ko ulfat ne ahd
yak-qalam manzūr hai jo kuchh pareshānī kare

zulf-e-mo.ambar us ne jo kholī to yuuñ mahfil saarī mahkī
aave chaman se mausam-e-gul meñ bād-e-sabā kā jaise jhoñkā

sub.h tak zulf-e-siyah-rañg kā jaadū thā ajab
raat botal meñ thī jitnī bhī bachī ḳharch huī

Das ga.iiñ haa.e mire dil ke ta.iiñ aaj 'baqā'
nāgineñ zulf kī us sar se utar dosh kī raah

maiñ dil-e-sad-chāk kā kahtā thā haal
shāna abas zulf se uljhā kiyā

zulf us āriz-e-rañgīñ pe bikharne jo lagī
bol uThī muñh se vahīñ bād-e-sabā bismillāh

dil ḳhush na huā zulf-e-pareshāñ se nikal kar
pachhtā.e ham is shām-e-ġharībāñ se nikal kar

raat mahkī huī aa.ī hai kahīñ se pūchho
aaj bikhrā.e hue zulf-e-trah-dār hai kaun

jab zulf sharīr ho ga.ī hai
ḳhud apnī asiir ho ga.ī hai

mirī hayāt tirī zulf kī panāh meñ hai
shikast de na sakegā mujhe sahar kā fareb

kuchh terī zulf khulī to merī sāñsoñ pe khulī
tujh pe āvāra-e-ham-rañg-e-sabā maiñ hī huā

zulf-e-sumbul nik.hat-e-gul mauj-e-sabza mauj-e-āb
baaġh meñ koī jagah ḳhālī na dekhī daam se

sab pech-o-tāb-e-shauq ke tūfān tham ga.e
vo zulf khul ga.ī to havāoñ ke ḳham ga.e

jab phañsā zulf meñ jā dil na rahā nañg-o-hayā
taaq par rakhiye vahāñ nañg-o-sharam donoñ ek

vasf zulf-e-yār kā āsāñ nahīñ
rishta-e-fikr-e-rasā darkār hai

mirī zindagī kī zīnat huī āfat-o-balā se
maiñ vo zulf-e-ḳham-ba-ḳham huuñ jo sañvar ga.ī havā se

zulf uljhī huī hai sāvan sī
barsā barsā shabāb lagtī ho

zulf dikhlā ke dil lapeT liyā
ab pareshāñ hai haal majlis kā

vo apnī zulf bikhrā kar tasavvur hī meñ aa jaate
ye saaya bhī uThā ab to mirī ummīd ke sar se