Tags-Zulf

zulf ghaTā ban kar rah jaa.e aañkh kañval ho jaa.e
shāyad un ko pal bhar socheñ aur ġhazal ho jaa.e

jin ko mashshātgī-e-zulf kā da.avā thā bahut
kar ga.e gesū-e-getī vo pareshāñ kuchh aur

kal bazm meñ darāzī-e-shab kī chalī jo baat
maiñ rāz-dāñ thā zulf-e-rasā tak pahuñch gayā

girah ho zulf kī dil meñ hamāre
hamārā uqda-e-mushkil ho ham hoñ

zulf-e-darāz ban ke ulajhtī rahī mudām
ik tār-e-ankabūt hai duniyā kahīñ jise

zulf-e-mutavval o dahan-e-muḳhtasar kuuñ dekh
tere daras ke ilm meñ fāzil huā huuñ maiñ

dil to ech-pechoñ se dām-e-ḳhat ke chhūTā thā
zulf phir na.e sar se sar upar balā laa.ī

vo zulf mere baazū pe bikhrī nahīñ to maiñ
us zulf se ziyāda pareshān ho gayā

mumkin hai ki ik roz tirī zulf bhī chhū leñ
vo haath jo masrūf-e-garebān rahe haiñ

mire haath suljhā hī leñge kisī din
abhī zulf-e-hastī meñ ḳham hai to kyā ġham

shāyad us zulf se lagī hai 'mīr'
baav meñ ik dimāġh nikle hai

bazm meñ bulvā.e jaldī ki ik muddat se hai
ishtiyāq-e-zulf-o-ḳhat-o-chashm-o-lab meñ aa.ina

zulf-o-lab-o-ruḳhsār kisī kā hai merā mauzū-e-suḳhan
tārīkī se nūr-e-nazar tak ek kahānī biich meñ hai

rishta-e-tār-e-tamannā nahīñ TuuTā ab tak
ab bhī āñkhoñ meñ tirī zulf kā ḳham rahtā hai

zarā zulf ko sambhālo mirā dil dhaḌak rahā hai
koī aur tā.ir-e-dil tah-e-dām aa na jaa.e

aah kyā kiije zulf o ruḳh us kā
chit chaḌhā hī rahe hai lail o nahār

aariz us ke par nahīñ zulf-e-siyāh
ganj par sote haiñ do kaale paḌe

uTh ga.ī aañkh to gardāb kā dil Duub gayā
khul ga.ī zulf to maujoñ ne kināre māñge

ruḳh-o-zulf kā huuñ fasāna-ḳhvāñ yahī mashġhala yahī kaam hai
mujhe din kā chain azāb-e-jāñ mujhe shab kī niiñd harām hai

vo zulf dhuup meñ furqat kī aa.ī hai jab yaad
to bādal aa.e haiñ aur shāmiyāne ho ga.e haiñ