Tags-Baam

aaj jī bhar ke use dekh le 'kausar' sar-e-bām
jaane un galiyoñ meñ phir kab tirā pherā hogā

yahī dīvār-o-dar-o-bām the mere hamrāz
inhī galiyoñ meñ bhaTaktī thī javānī merī

ik sitāra jo chamaktā hai lab-e-bām kahīñ
dekhte dekhte ho jaatā hai mahtāb meñ gum

phir mire ghar kī fazāoñ meñ huā sannāTā
phir dar-o-bām se andesha-e-goyā.ī hai

bām-o-dar par reñgtī parchhā.iyāñ
mujh se ab mānūs haiñ tanhā.iyāñ

maiñ maan nahīñ paayā magar dekh rahā thā
us shaḳhs kī chaukhaT pe dar-o-bām paḌe the

bār-hā dekhī hai un kūchoñ ne shab-mastī mirī
aaj bhī ik ghar ke bām-o-dar shanāsā haiñ vahāñ

jo kiran thī kisī darīche kī
markaz-e-bām ho rahī hai ab

baiThe haiñ 'nadīm' ab bhī liye hasrat-e-dīdār
phir sū-e-dar-o-bām sanam dekh rahe haiñ

bichhvā.īye na chāñdnī meñ baam par palañg
manhūs hai qirān mah o āftāb kā

le gayā hamrāh apne vo makāñ aur bām-o-dar
hai nazar sab kuchh magar ik be-makānī de gayā

kahāñ pe so.e the 'amjad' kahāñ khulīñ āñkheñ
gumāñ qafas kā hameñ apne bām-o-dar se huā

maiñ vo gardan-zadanī huuñ ki tamāshe ko mire
shahr ke log khaḌe haiñ ba-sar-e-bām tamām

hañgāma kyuuñ bapā hai zarā baam par se dekh
shole buland hote haiñ ye kis ke ghar se dekh

kuchh husn-e-vafā ke dīvāne phir ishq kī raah meñ kaam aa.e
ai kaash tamāshā karne ko ḳhud tū bhī kanār-e-bām aa.e

ham kitnī piine vaale haiñ tum kitnī pilāne vaale ho
ye raaz hai tasht-az-bām ki saaqī raat guzarne vaalī hai

is tarah to aur bhī terī ghuTan baḌh jā.egī
ham-navā koī nahīñ to bām-o-dar se baat kar

kū-e-jānāñ meñ qadam paḌte haiñ halke halke
āshiyāne kī taraf tā.ir-e-bām āhista

agarche khā ga.ī dīmak ġhamoñ kī bām-o-dar ko
magar TuuTī abhī tak ye fasīl-e-jāñ nahīñ hai

jal uThe bazm-e-ġhair ke dar-o-bām
jab bhī ham ḳhānumāñ-ḳharāb aa.e