Tags-Baam

is hasīñ tasavvur kā merī surḳh āñkhoñ se
aab o gil kā naata hai bām-o-dar kā rishta hai

samtoñ meñ bikhrī vo ḳhalvat vo dil kī rañg-e-ābādī
ya.anī vo jo bām-o-dar the yaksar gard-o-bād hue

bastiyoñ meñ ik sadā-e-be-sadā rah jā.egī
baam o dar pe naqsh tahrīr-e-havā rah jā.egī

nazzāra jo hotā hai lab-e-bām tumhārā
duniyā meñ uchhaltā hai bahut naam tumhārā

tab falak par qamar nahīñ aatā
yaar jab baam par nahīñ aatā

shab-gazīda dayāroñ ke nāqa-savāroñ meñ mahtāb-chehra tumhārā na thā
ḳhaak meñ mil ga.e raah takte hue sab ḳhamīda kamar bām-o-dar yā aḳhī

uchak rahā hai khaḌā bām-e-arsh par kam-baḳht
qalaq hai mujh ko 'shahīdī' kī nā-rasā.ī kā

aadhī raat ko hastī kā mafhūm samajh meñ aatā hai
bām-o-dar ke sannāTe jab aapas meñ Takrāte haiñ

hai kaun jalva-sarā bām-e-āfrīnash par
utar ga.e haiñ sitāre se chashm-e-bīnā meñ

ik barf sī jamī rahe dīvār-o-bām par
ik aag mere kamre ke andar lagī rahe

vahī āhaTeñ dar-o-bām par vahī rat-jagoñ ke azaab haiñ
vahī adh-bujhī mirī niiñd hai vahī adh-jale mire ḳhvāb haiñ

vahī log haiñ vahī naam haiñ vahī ghar vahī dar-o-bām haiñ
magar ab darīchoñ kī oT se hameñ jhāñktā koī aur hai

tujh ko maiñ DhūñDhtā phirtā huuñ dar-o-bām se duur
ab tajallī-e-dar-o-bām se jī Dartā hai

ho ga.e aur dar-o-bām nazar se ojhal
dar-haqīqat ye ujālā bhī añdherā niklā

mil ga.ī rāh-e-yaqīñ manzil-e-auhām ke baad
jalve hī jalve nazar aa.e dar-o-bām ke baad

bām-o-dar par utarne vaalī dhuup
sabz rañg-e-malāl rakhtī hai

kahāñ kī vahshateñ dīvār-o-bām-o-dar par haiñ
ajiib ḳhauf mire sehn-e-jāñ meñ raushan haiñ

jalte bām-o-dar-o-dīvār sulagte hue shahr
jin se pathrā ga.iiñ āñkheñ vo samāñ dekhe haiñ