Tags-Baam

ishq-e-āvāra kahāñ qaid-e-dar-o-bām kahāñ
be-navāoñ ke liye sāya-e-dīvār bahut

shaam hī se mah-e-tamām chaḌhne lagā falak kā baam
āḳhir-e-shab ye narm-gām ek utaar meñ milā

yahī kaheñge ki ik ḳhauf thā bulandī kā
kisī ke bām-e-nazar se utar ga.e ham bhī

bām-o-dar dekhte jaate haiñ khaḌe sakte meñ
ik sitāre kā tavārud tirī peshānī meñ

khaTaktī hai kisī shai kī kamī is dār-e-fānī meñ
shikasta bām-o-dar jis ke na hoñ ghar ho nahīñ saktā

kuchh ban paḌā na hasrat-e-tāmīr se to phir
ujḌe hue khañDar ko dar-o-bām likh diyā

dikhlā.ī sair āñkhoñ ko bām-e-murād kī
aisī koī kamand koī nardbāñ na thī

aur vo baam se utar bhī gayā
log samjhe the vāqa.ī din hai

bām-o-dar ko dekhtī rahtī haiñ merī hasrateñ
kaun chaspāñ kar gayā sharmindagī dīvār par

ik bām-e-suḳhan par ham ne bhī kuchh kahne kī ḳhvāhish kī thī
ik umr ke ba.ad hamāre liye ab jā ke samā.at jaagī hai

jaise har ek darīche meñ tirā chehra ho
yuuñ mire haal pe hañste haiñ dar-o-bām ka.ī

agarche dekhne vaale tire hazāroñ the
tabāh-hāl bahut zer-e-bām kis kā thā

jab farāz-e-bām par vo jalva-gar hotā nahīñ
koī aalam ho nazar meñ mo'atabar hotā nahīñ

milī na fursat-e-ārā.ish-e-bayābāñ bhī
ki ham yahāñ bhī tire bām-o-dar banāte haiñ

kaisā nazzārā thā kohsāroñ kī shahzādī kā
baam par vo khaḌī thī farsh pe bādal paḌe the

patthar ke log haiñ jahāñ shīshe ke bām-o-dar
ham us zamīñ meñ dard-e-vafā bo nahīñ sake

nashshe meñ Dagmagā ke na chal sīTiyāñ bajā
shāyad koī charāġh utar aa.e baam se

vo sub.h ko is Dar se nahīñ baam par aatā
naama na koī bāñdh de sūraj kī kiran meñ

hai dil meñ ghar ko shahar se sahrā meñ le chaleñ
uThvā ke āñsuoñ se dar-o-bām dosh par

chāñd kī kagar raushan
shab ke bām-o-dar raushan