Tags-Baam

āftāb-e-lab-e-bām ab to hue haiñ 'kaifī'
āñkheñ phir us se laḌā.eñ bhalā kyā koThe par

tasht-az-bām na karnā kahīñ rāz-e-ulfat
na ishāre karo ai shoḳh-adā koThe par

tishna-kāmān-e-nazāra ko ye muzhda de do
be-naqāb aaj koī phir sar-e-bām aayā hai

tere taġhāful ne kiyā zaḳhmī terī adāoñ ne hameñ maarā
chāhne vāloñ ke liye zālim the yahī atom-bām munāsib

na jā sakegī vahāñ tak nigāh-e-ām abhī
mirā mazāq bahut hai buland-bām abhī

koī bhī sajnī kisī bhī sājan kī muntazir hai na muztarib hai
tamām baam aur dar bujhe haiñ kahīñ bhī raushan diyā nahīñ hai

rah-guzar, saa.e, shajar, manzil-o-dar, halqa-e-bām
baam par sīna-e-mahtāb khulā, āhista

tumhāre baam se ab kam nahīñ hai rif.at-e-dār
jo dekhnā ho to dekho nazar uThā ke mujhe

qumqumoñ kī aañch ne pighlā diye manzar tamām
chāñd ab koī kisī bhī baam par miltā nahīñ

darīchoñ ko to dekho chilmanoñ ke raaz to samjho
uTheñge parda-hā-e-bām-o-dar āhista āhista

dālān-o-dar meñ ek tavaqqo.a thī mauj mauj
dīvār-o-bām the ki bhañvar intizār thā

ye vāhime bhī ajab bām-o-dar banāte haiñ
havā kī shāḳh pe ḳhushbū kā ghar banāte haiñ

is baar to raste bhī mujhe rok rahe haiñ
dīvār-o-dar-o-bām hī ulfat nahīñ karte

manzar-e-bām sar-e-dīd nahīñ khultā hai
kuchh hai nā-dīda kā asrār tire kūche meñ

mānūs bām-o-dar se nazar pūchhtī rahī
un meñ base vo log purāne kahāñ ga.e

kabhī mausamoñ ke sarāb meñ kabhī bām-o-dar ke azaab meñ
vahāñ umr ham ne guzār dī jahāñ saañs lenā muhāl thā

phir jalānā mah-o-ḳhurshīd kī mahfil meñ charāġh
pahle apne hī dar-o-bām kī kuchh baat karo

parvāz kī tāqat nahīñ yaañ tā-sar-e-dīvār
kyūñkar ho pahuñchnā ba-lab-e-bām hamārā

thī hameñ malhūz-e-ḳhātir nek-nāmī is qadar
chuum kar nazroñ se un ke bām-o-dar vāpas hue

na ḳhushbū pairahan kī hai na zulfoñ kī na bātoñ kī
hameñ ye jalva-e-bālā-e-bām achchhā nahīñ lagtā