Tags-Bahaar

phir aa.e bahār phir ho vahshat
dil roz duā.eñ māñgtā hai

banā ke ā.īna-e-tasavvur jahāñ dil-e-dāġh-dār dekhā
firāq meñ lutf-e-vasl paayā ḳhizāñ meñ rañg-e-bahār dekhā

be-barg be-libās daraḳhtoñ kī Tahniyāñ
paiġhām-e-nau-bahār haiñ tū jaag to sahī

na jaao dekh lo sham-e-sahar kā jhilmilānā bhī
ye mahfil kī bahār-e-āḳhirī ma.alūm hotī hai

huā ḳhema-zan kārvān-e-bahār
iram ban gayā dāman-e-koh-sār

dekhī na thī bahār abhī tere shabāb kī
bhūlā na thā abhī tire ahd-e-siġhar ko maiñ

mīr-e-sipāh nā-sazā lashkariyāñ shikasta saf
aah vo tīr-e-nīm-kash jis kā na ho koī hadaf

maiñ aur kuchh nahīñ kahtā magar chaman vaalo
bahār aatī to gulshan sañvar ga.e hote

nasīm-e-sub.h ke jhoñke mirī taraf kyuuñ aa.e
jahāñ bahār hai gul haiñ udhar ga.e hote

the bazm meñ vo ġhuncha-e-afsurda sharm se
kyūñkar kahūñ bahār meñ rañg-e-ḳhizāñ na thā

jaate haiñ ki guzrā hai ye din jin kī ḳhizāñ meñ
āñkhoñ meñ bahār un ke liye laa.e haiñ yaaro

atā-patā kisī ḳhushbū se pūchh lo merā
yahīñ kahīñ kisī manzar kisī bahār meñ huuñ

ravish ravish pe chaman ke bujhe bujhe manzar
ye kah rahe haiñ yahāñ se bahār guzrī hai

fasl-e-ḳhizāñ meñ kyā hogā āsār numāyāñ haiñ jis ke
fasl-e-bahār meñ 'barqī' apne dil kī kalī murjhā.e to

bād-e-ḳhizāñ kā shukr karo 'faiz' jis ke haath
naame kisī bahār-e-shimā.il se aa.e haiñ

bahār hai yā sharāb-e-rañgīñ nashāt-afroz kaif-āgīñ
guloñ ke sāġhar chhalak rahe haiñ guloñ pe bulbul chahak rahe haiñ

lachak rahī hai vafūr-e-samar se shāḳh-e-hayāt
ye baar hañs ke uThāo bahār ke din haiñ

milā ke qatra-e-shabnam meñ rañg o nik.hat-e-gul
koī sharāb banāo bahār ke din haiñ

purānī sham.eñ bujhā diiñ sabā ke jhoñkoñ ne
na.e charāġh jalāo bahār ke din haiñ

ezār-e-gul kī dahak se jalā ke kāñToñ ko
lagī diloñ kī bujhāo bahār ke din haiñ