Tags-Bahaar

ilāhī ḳhair ho un be-zabāñ asīroñ kī
qafas ke sāmne zikr-e-bahār hotā hai

kabhī jo aañkh pe gesū-e-yār hotā hai
sharāb-ḳhāne pe abr-e-bahār hotā hai

dil-e-hazīñ ko mire jalva-zār hone do
ḳhizāñ-nasīb chaman meñ bahār hone do

nigāh-e-shauq ko ruḳh par nisār hone do
ye rañg lā.egī kyā kyā bahār hone do

taḌap ke ābla-pā ek baar phir uTThe
ye kisī ne tazkira-e-āmad-e-bahār kiyā

fusūñ ajiib ye ai mausam-e-bahār kiyā
ki ḳhār-zār ko ham-rañg-lāla-zār kiyā

tum duur ho to laakh bahāreñ bhī haiñ ḳhizāñ
tum paas ho agar to ḳhizāñ bhī bahār hai

maiñ apne gulshan meñ mausamoñ ke azaab gin gin ke thak gayā huuñ
maiñ kaise kah duuñ bahār aa.ī maiñ kaise kah duuñ bahār dekhī

na koī nīlam na koī hiirā na motiyoñ kī bahār dekhī
samundaroñ kī tahoñ meñ utrā to pattharoñ kī qatār dekhī

hai naved-e-bahār har lab par
kam-nasīboñ ko e'tibār nahīñ

tar-ba-tar ḳhuun meñ hai dāman-e-ummīd-e-bahār
haath meñ zaḳhm hai TuuTe hue paimāne kā

'saif' ye chashmakeñ ye rañg-e-bahār
kyā isī gulsitāñ ke ham bhī haiñ

ābla-pā payām chhoḌ ga.e
log nazzāra-e-bahār kareñ

maiñ tohfa le ke aayā huuñ tamannāoñ ke phūloñ kā
luTāne ko bahār-e-zindagānī le ke aayā huuñ

ḳhizāñ kā daur gayā mausam-e-bahār aayā
magar na us dil-e-be-sabr ko qarār aayā

is ek baat se gulchīñ kā dil dhaḌaktā hai
ki ham sabā se hadīs-e-bahār kahte haiñ

pukārtā hai junūñ hosh meñ jo aatā huuñ
Thahar Thahar abhī fasl-e-bahār baaqī hai

shabāb ho ki na ho husn-e-yār baaqī hai
yahāñ koī bhī ho mausam bahār baaqī hai