Tags-Bahaar

vo rashk-e-bahār aane vaalā hai 'aḳhtar'
kañval hasratoñ ke khile jā rahe haiñ

kabhī raqs-e-shām-e-bahār meñ use dekhte
kabhī ḳhvāhishoñ ke ġhubār meñ use dekhte

jhoñkā qafas meñ aayā jo bād-e-bahār kā
pahlū se dil nikal chalā san-san ke saath saath

'raihanī'-e-hazīñ hai ḳhizāñ meñ ġhazal-sarā
rañgnī-e-bahār kā saudā liye hue

ġhubār ban ke lipaTtī hai dāman-e-dil se
miTe pe bhī vahī dil-bastagī bahār meñ hai

dikhā.ī aaj hī āñkhoñ ne sūrat-e-fardā
ḳhizāñ kī sair bhī hañgāma-e-bahār meñ hai

mujhe us junūñ kī hai justujū jo chaman ko baḳhsh de rañg o bū
jo naved-e-fasl-e-bahār ho mujhe us nazar kī talāsh hai

farsh-e-gul phir bichhā rahī hai nasīm
aa.iye mausam-e-bahār aayā

bahār aa.ī kar ai bāġhbāñ gulāb qalam
ki likkhe vasf-e-ruḳh-e-yār kī kitāb qalam

pahuñcheñ na tujh ko gul-izār yak do sah chaar panj o shash
ruḳh tirā ek aur bahār yak do sah chaar panj o shash

saaqī haiñ roz-e-nau-bahār yak do sah chaar panj o shash
de mujhe jām-e-ḳhush-gavār yak do sah chaar panj o shash

girā.īñ shāḳh shāḳh se ḳhizāñ ne phuul pattiyāñ
uḌe jo biij har taraf to phir bahār aa ga.ī

ab ke bahār aane ke imkān haiñ ki hai
har pairahan pe chashm-e-rafū-gar lagī huī

dikhāte ham dil-e-pur-dāġh kī bahār use
ye manzar aur zarā sā bhī ḳhushnumā na huā

so ke jab vo nigār uThtā hai
misl-e-abr-e-bahār uThtā hai

paudā jo kal thā ab shajar-e-sāya-dār hai
paapā miyāñ ke baaġh meñ kaisī bahār hai

chalo ki jashn-e-bahār dekheñ chalo ki zarf-e-bahār jāñcheñ
chaman chaman raushnī huī hai kalī kalī pe nikhār sā hai

ye zulf-bar-dosh kaun aayā ye kis kī aahaT se gul khile haiñ
mahak rahī hai fazā-e-hastī tamām aalam bahār sā hai

is dil meñ to ḳhizāñ kī havā tak nahīñ lagī
is phuul ko tabāh kiyā hai bahār ne

un se bahār o baaġh kī bāteñ kar ke jī ko dukhānā kyā
jin ko ek zamāna guzrā kunj-e-qafas meñ raam hue