Tags-Bahaar

ishrat-e-sub.h-e-bahār sair-e-gul-o-lāla-zār
koī ise kuchh kaho ham to samajhte haiñ ḳhvāb

us rū-e-tābnāk pe har qatra-e-araq
goyā ki ik sitāra hai sub.h-e-bahār kā

dekh apne dar-e-gosh ko aariz se muttasil
dekhā na ho sitāra jo sub.h-e-bahār kā

ab jo khile haiñ dil meñ phuul un kī bahār hai na.ī
ab jo lagī hai dil meñ aag us kā jalāl hai nayā

koī bahār kī ḳhātir koī ḳhizāñ ke liye
bas ek maiñ hī rahā sirf gulsitāñ ke liye

mujhe haiñ ḳhaar se kuchh ḳhaas nisbateñ ki ye gul
bahār meñ na khilā raunaq-e-ḳhizāñ ke liye

muztarib girya naak hai ye gul
barq abr-e-bahār haiñ ham bhī

ḳhizāñ kī zard sī rañgat badal bhī saktī hai
bahār aane kī sūrat nikal bhī saktī hai

ab deñge kyā kisī ko ye jhoñke bahār ke
māñgeñge dil ke zaḳhm bhī purvā.iyoñ se ham

use chaman kī bahār-o-ḳhizāñ se kyā matlab
vo ek bholī sī chiḌiyā thī chahchahātī rahī

na.e zaḳhm haiñ na.ī koñpleñ abhī dil pe ġham kī bahār hai
ye duā karo ki ḳhizāñ meñ bhī ye daraḳht yūñhī harā rahe

khulā hai is pe kuchh aise bahār kā mausam
hai ruḳh pe rañg qabā meñ patañg uḌtī hai

ḳhyāl-e-zīnat-e-fasl-e-bahār se pahle
mizāj-dānī-e-barq-o-sharar zarūrī hai

ab kī fasl-e-bahār se pahle
rañg the gulistāñ meñ kyā kyā kuchh

ḳhizāñ kā daur to ho jaa.e ruḳhsat
gulistāñ meñ bahār aa.e na aa.e

maiñ samajhtā huuñ phir bahār aa.ī
koī letā hai jab ḳhizāñ kā naam

garche hai dil-kushā bahut husn-e-farañg kī bahār
tā.erak-e-buland-bām dāna-o-dām se guzar

na.ī bahār kā thā muntazir chaman merā
jo us kā lams milā khil uThā badan merā

lutf aa.e jo koī soḳhta-sāmān-e-bahār
ḳhāliq-e-rañg se phir sho.ala-e-uryāñ māñge