Tags-Bahaar

zindagī ḳhār-zār meñ guzrī
justajū-e-bahār meñ guzrī

masarratoñ meñ chhupā husn-e-dil ko kyā ma.alūm
ye regzār jamāl-e-bahār kyā jaane

siine meñ dāġh-hā-e-mohabbat kī hai bahār
phūlā hai ḳhuub ye chaman dil-kushā-e-dost

ronā ḳhushī kā rotī hai bulbul bahār meñ
chhiḌkāv ho rahā hai chaman meñ gulāb kā

mujhe bahār-e-gulistāñ pe naaz ho kyūñkar
mirī nazar meñ ma.āl-e-bahār rahtā hai

lab ho kisī bahār-e-muambar se bosa-yāb
aur us ke shukr meñ koī hoñToñ kā jaam ho

pī kar lahū siyāh huī kisht-e-ārzū
kyā dekhte ki ḳhaak kā da.avā bahār thā

dayār-e-dil meñ na jaane hai kab se vīrānī
va-lek shahr-e-nigārāñ meñ hai bahār abhī

māyūs ḳhud-ba-ḳhud dil-e-ummīd-vār hai
is gul meñ bū ḳhizāñ kī hai rañg-e-bahār hai

bahār ab aa ke kyā karegī ki jin se thā jashn-e-rañg-o-naġhma
vo gul sar-e-shāḳh jal ga.e haiñ vo dil tah-e-dām bujh ga.e haiñ

'muztar' har aa.ine meñ thā aks-e-bahār bas
maiñ apnī aarzū se bahut pā.emāl thā

umīd-e-silsila-dar-silsila lutf-o-davām is meñ
bahār-e-umr-e-fānī jāvedāñ yuuñ bhī hai aur yuuñ bhī

bū-e-gul bād-e-sabā laa.ī bahut der ke ba.ad
mere gulshan meñ bahār aa.ī bahut der ke ba.ad

ḳhār-ba-ḳhār gul-ba-gul fasl-e-bahār aa ga.ī
fasl-e-bahār aa ga.ī zaḳhm bahāl ho ga.e

shām-e-abad ko jalva-e-sub.h-e-bahār de
rūdād chheḌ zindagī-e-be-sabāt kī

bahār aa.egī jab aa.egī ye shart nahīñ
ki tishna-kām raheñ garche baada rakhte haiñ

us ko ḳhizāñ ke aane kā kyā ranj kyā qalaq
rote kaTā ho jis ko zamāna bahār kā

guloñ ke chehroñ pe zardī sī phir rahī hai tamām
ga.ī bahār vo mausam kā ibtidā na rahā

ek us ke dam se har mausam huā rashk-e-bahār
ek shāḳh-e-ārzū ko be-samar us ne kiyā