Tags-Bahaar

har gul kā chaak siina gulzār āfrīnā
ab ke ajab ḳhazīna terī bahār laa.ī

bahār aa.ī tuḌāne phir lage zanjīr dīvāne
huā shor-e-junūñ barpā ahāhāhā ahāhāhā

na.ī bahār ne paiġhām ye havā ko diyā
guloñ ke tan se ḳhizāñ kā kafan utaar ke aa

mahzūz ham bhī hoñge jo fursat kahīñ mile
gulshan bhī hai gulāb bhī rañg-e-bahār bhī

lahū nichoḌ lo mumkin hai kal bahār ke baad
ragoñ meñ phailī huī sansanāhaTeñ hoñgī

rut badaltī rahī rañg uḌte rahe kam-nazar bāġhbāñ kam-nazar hī rahe
ik ḳhayābāñ ko sairāb karte rahe ābrū-e-bahār-e-chaman bech kar

tire ḳhat kā zamurrad-rañg dekhe
bahār-e-sumbulistāñ yaad aave

guzre the na chashm-e-bāġhbāñ se
jo ab kī bahār gul khile haiñ

use ajab thā ġhurūr-e-shaguft-e-ruḳhsārī
bahār-e-gul ko bahut be-hunar kahā us ne

bahār aane se pahle ik pareshāñ ḳhvāb dekhā thā
ki jaise fasl-e-gul meñ chhuT rahā hai āshiyāñ ham se

ik nau-bahār-e-nāz ko mehmāñ kareñge ham
har dāġh-e-dil ko rashk-e-gulistāñ kareñge ham

saaqī kuchh aaj tujh ko ḳhabar hai basant kī
har sū bahār pesh-e-nazar hai basant kī

un ko yaañ vaade pe aa lene de ai abr-e-bahār
jis qadar chāhnā phir baad meñ barsā karnā

bahār kī tum na.ī kalī ho abhī abhī jhuum kar khilī ho
magar kabhī ham se yūñhī pūchho ki hasratoñ kā mazār kyā hai

bahār aa.ī to har-sū thiiñ katraneñ us kī
bahār aa.ī to ham ne ḳhizāñ ko pahchānā

bahār aate hī vahshat agar le añgḌā.ī
to phir ye zaḳhm ke Tāñke haiñ kyā rafū kyā hai

ho koī fasl magar zaḳhm khul hī jaate haiñ
sadā-bahār dil-e-dāġh-dār apnā hai

bahār ab ke jo guzrī to phir na aa.egī
bichhaḌne vaale bichhaḌte samay ye kah ga.e haiñ

itne bhī na ham ḳharāb hote rahte
kaahe ko ġham-o-alam se rote rahte