Tags-Bahaar

har palak ho nam-āshnā mujh se
merā lahja bahār sā kar de

fasl-e-bahār aa.ī hai kaise yaqīñ kareñ
'shārib' hai jis kā naam vo dīvāna ghar meñ hai

ḳhāmosh zindagī bhī dalīl-e-bahār hai
ye dars le rahe haiñ chaman meñ kalī se ham

bahār-e-bāġh ho miinā ho jām-e-sahbā ho
havā ho abr ho saaqī ho aur dariyā ho

isī umiid pe ham din ḳhizāñ ke kāTte haiñ
kabhī to bād-e-bahār aa.egī chaman kī taraf

har ek phuul ke dāman meñ ḳhaar kaisā hai
batā.e kaun ki rañg-e-bahār kaisā hai

phir bahār aa.ī hai phir josh meñ saudā hogā
zaḳhm-e-derīnā se phir ḳhuun Tapaktā hogā

bad-rañg sī bahār hai fasl-e-bahār meñ
bashshāsh dil nahīñ hai tabī.at harī nahīñ

phir bahār ke sāthī aa ga.e Thikānoñ par
surḳh surḳh ghar nikle sabz sabz shāḳhoñ par

bahār aate hī phūloñ ne chhāvnī chhā.ī
ki DhūñDhtā huuñ mujhe āshiyāñ nahīñ miltā

chashm-e-giryāñ kī ābyārī se
dil ke dāġhoñ pe phir bahār aa.ī

ai bulbulo chaman meñ na jaao ga.ī bahār
gulshan meñ ḳhār-o-ḳhas ke sivā kuchh rahā nahīñ

bāteñ karo nigār o bahār o sharāb kī
azkār-e-shar-o-dīñ na karo ham nashe meñ haiñ

le ga.e kis ke ruḳh o gesū bahār-e-roz-o-shab
muddatoñ se ghar ko be-shām-o-sahar paatā huuñ maiñ

bahār-e-jalva-e-gul to nazar meñ thī kal bhī
tahī thā dast-e-talab aaj bhī tahī hogā

jab tum ho mere paas ḳhizāñ bhī bahār hai
tum hī nahīñ to kaise lage dil bahār meñ

allāh re ye bāda-e-rañgīñ kī shoḳhiyāñ
zāhid ko piinī paḌ ga.ī ab kī bahār meñ

mirī be-kalī thī shaguftagī so bahār mujh se lipaT ga.ī
kahā vahm ne ki ye kaun thā to ḳhayāl terī taraf gayā

jo bahār gul pe rahī hai tul hameñ kyā jo husn kī pī hai mul
jinheñ chāhiye hai vo rashk-e-gul unheñ gul se kyā sarokār hai