Tags-Bahaar

aap kī marzī kā hai pāband-e-rañg-e-gulistāñ
aap chāheñ to bahār-e-jāvedāñ paidā kareñ

ehtimām-e-rañg-o-bū se gulistāñ paidā kareñ
aao mil-jul kar bahār-e-be-ḳhizāñ paidā kareñ

lutf ye hai ki aadmī aam kare bahār ko
mauj-e-havā-e-rañg meñ aap nahā liyā to kyā

gul-o-bahār kā anjām hai jinheñ ma.alūm
chaman ko dām-gah-e-hādsāt kahte haiñ

kyā ḳhabar mujh ko ḳhizāñ kyā chiiz hai kaisī bahār
āñkheñ kholīñ aa ke maiñ ne ḳhāna-e-sayyād meñ

ye saaf zāhir hai zindagī meñ sukūñ kī hogī na koī sūrat
kahīñ ḳhizāñ kī ijāra-dārī kahīñ fareb-e-bahār hogā

jī chal paḌā ḳhizāoñ kī jānib udaas shab
ye lag ga.ī bahār meñ kis kī nazar mujhe

lauTeñge tere aate hī phir din bahār ke
rahtī hai dil meñ aas ki zinda huuñ maiñ

jashn-e-bahār-e-nau hai nasheman kī ḳhair ho
uTThā hai kyuuñ chaman meñ dhuāñ raushnī ke saath

phir is ke ba.ad manāyā na jashn ḳhushbū kā
lahū meñ Duubī thī fasl-e-bahār kyā karte

sarmāya-e-e.atibār de deñ tum ko
rañg-e-husn-e-bahār de deñ tum ko

merī havas ke andarūñ mahrūmiyāñ haiñ dost
vāmāñda-e-bahār huuñ ghaTiyā kahe so huuñ

bahār hai ki ḳhizāñ 'shauq' ham yahī jaane
ki un ke aane se rañg-o-bahār hone lagā

hue ḳhush ham ek nigār se hue shaad us kī bahār se
kabhī shaan se kabhī aan se kabhī naaz se kabhī pyaar se

machī hai har taraf kyā kyā salonoñ kī bahār ab to
har ik gul-rū phire hai rākhī bāñdhe haath meñ ḳhush ho

bahār chāk-e-garebāñ meñ Thahr jaatī hai
junūñ kī mauj koī āstīñ meñ hotī hai

har zarra lāla-zār hai taaza lahū kī tarah
barsā hai is dayār meñ abr-e-bahār kyā

apnī qismat meñ hai nok-e-ḳhār yā shāḳh-e-bahār
phuul haiñ yā phuljhaḌī hai raushnī ai raushnī

tū ne dekhī to hogī shām-e-ḳhizāñ
ai marīz-e-bahār sone de

shabāb-e-lāl-o-gul ko pukārne vaalo
ḳhizāñ-sarisht bahār aa ga.ī to kyā hogā