Tags-Bahaar

ye barq o baad kī yūrish ye zahr kī bārish
milī hai ahl-e-chaman ko bahār kī sauġhāt

vo nau-bahār-e-husn bhī is raah se gayā
har naqsh-e-pā ko rauza-e-rizvāñ kiye hue

ruḳh se uḌtā huā vo rañg-e-bahār
ek tasvīr purānī meñ rahā

ḳhizāñ kā daur hai magar vo is adā se aa.e haiñ
bahār 'darshan'-e-hazīñ kī zindagī pe chhā ga.ī

kisī kī shām-e-sādgī sahar kā rañg pā ga.ī
sabā ke paañv thak ga.e magar bahār aa ga.ī

dil pūchhtā hai aaj bhī vo rashk-e-nau-bahār
aayā na us ke va.ada-o-paimāñ ko kyā huā

dāman ke chaak chaak meñ hai mausam-e-bahār
aao ki ḳhūn-e-dil se kareñ guf-fishāniyāñ

shāḳh par ek phuul bhī 'tābish'
mujh se milne bahār meñ aayā

'azfarī' ġhuncha-e-dil band aur aa.ī hai bahār
sair-e-gul ko ki ye shāyad ba-takalluf khil le

nām-e-bad-baḳhti-e-ushshāq-e-ḳhizāñ hai bulbul
tū agar nikle chaman se to bahār aa jaa.e

nasheman apnā uThā na yaañ se ḳhizāñ jo aa.ī to aa.ī bulbul
bahār ruḳhsat abhī huī hai guloñ kī bū bhī nahīñ ga.ī hai

gul kī bahār gulistāñ meñ chand roz hai
achchhā nahīñ hai is qadar ai mah-laqā dimāġh

haa.e phir fasl-e-bahār aa.ī 'ḳhizāñ'
kabhī marnā kabhī jiinā hai muhāl

hai bahār aa.ī qabā-e-gul se ab
bulbuloñ ko laal joḌā chāhiye

hai chaman meñ āmad-e-fasl-e-bahār
ab dar-e-zindāñ ko toḌā chāhiye

mahaktī zulfoñ se ḳhoshe guloñ ke chhūT gire
kuchh aur jaise ki gunjā.ish-e-bahār na thī

ye shauq le ke chalā hai chaman se shakl-e-nasīm
ki dekheñ miltī hai jaatī huī bahār kahāñ

umañg thī ye javānī kī yā koī āñdhī
milā ke ḳhaak meñ ham ko ga.ī bahār kahāñ

diloñ meñ farq huā jab to chaah pyaar kahāñ
chaman chaman hī nahīñ aa.egī bahār kahāñ

saaya hai chhāñv āftāb hai dhuup
dekh aaj dhuup chhāñv kī ye bahār