Tags-Bahaar

vo bāġhbāñ bhī koī bāġhbāñ hai jis kī hayāt
rahīn-e-minnat-e-fasl-e-bahār guzrī he

dekh kar parvānoñ ke par sub.h ko sābit huā
ye bahār-e-gulshan jūd-e-charāġh-e-kushta hai

husn-e-bahār mujh ko mukammal nahīñ lagā
maiñ ne tarāsh lī hai ḳhizāñ apne haath se

muflisī sab bahār khotī hai
mard kā e'tibār khotī hai

jo hai mizāj-e-bahār-e-chaman se nā-vāqif
barā-e-sair-e-chaman baar baar aa.egā

abhī to mausam-e-nā-ḳhush-gavār aa.egā
phir is ke ba.ad payām-e-bahār aa.egā

bahār par bhī ḳhizāñ hī kā rañg ġhālib hai
havā zamāne kī gulshan ko sāzgār nahīñ

jo haath aatā hai dāman to chhoḌ detā huuñ
junūñ-navāz abhī mausam-e-bahār nahīñ

guloñ ke chehra-e-rañgīñ pe vo nikhār nahīñ
bahār aa.ī magar ālam-e-bahār nahīñ

na nashāt-e-visāl na hijr kā ġham na ḳhayāl-e-bahār na ḳhauf-e-ḳhizāñ
na saqar kā ḳhatar hai na shauq-e-iram na sitam se hazar na karam se ġharaz

vo dhuup chhāñv kare kahkashāñ bahār kare
vo arz-o-tūl ke andar bañdhā nahīñ miltā

ġham-e-firāq meñ dil kyuuñ na dard-mañd rahe
bahār aa ke ga.ī ham qafas meñ band rahe

ye zulf-bar-dosh kaun aayā ye kis kī aahaT se gul khile haiñ
mahak rahī hai fazā-e-hastī tamām aalam bahār sā hai

dil o dimāġh meñ ehsās-e-ġham ubhār diyā
ye kis ne aaj mujhe muzhda-e-bahār diyā

junūñ le ke hamrāh aa.ī bahār
na.e sir se phir valvalā ho gayā

mirī zindagī pe na muskurā mujhe zindagī kā alam nahīñ
jise tere ġham se ho vāsta vo ḳhizāñ bahār se kam nahīñ

bahār-e-gul-kada-e-nāz dil-kushā hai magar
nasīm-e-shauq ḳhirāmāñ nahīñ to kuchh bhī nahīñ

jān-e-gulshan aur jānān-e-bahār
jāvedāñ sham-e-shabistān-e-bahār

chaman meñ ham na raheñge tire palaTne tak
Thahar Thahar zarā jaatī huī bahār Thahar

partav se jis ke ālam-e-imkāñ bahār hai
vo nau-bahār-e-nāz abhī rahguzar meñ hai