Tags-Bahaar

gulshan meñ un ko dekh ke mahv-e-ḳhirām-e-nāz
samjhī nigāh-e-shauq ki raqs-e-bahār hai

liye hue koī afsāna-e-bahār ga.ī
sabā chaman se bahut aaj sogvār ga.ī

koī tasavvur meñ jalva-gar hai bahār dil meñ samā rahī hai
nafas nafas gungunā rahā hai nazar nazar muskurā rahī hai

dil hai afsurda to bahār kahāñ
baaġh meñ har taraf udāsī hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

yahāñ ḳhizāñ kā na khaTkā na ḳhauf gulchīñ kā
bahār gul meñ rahe yā tumhāre gāloñ meñ

kaisā khilā hai phuul jab aayā bahār par
pūchhe to koī lutf-e-javānī javān se

dekhe bulbul jo yaar kī sūrat
phir na dekhe bahār kī sūrat

sīñchā thā jis ko ḳhūn-e-tamannā se rāt-din
gulshan meñ us bahār ke haqdār ham nahīñ

fazā chaman kī hai aisī ki kuchh nahīñ khultā
ḳhizāñ kī rut hai ki fasl-e-bahār hai, kyā hai

gulshan meñ bahār aa.e ki ḳhizāñ murjhā.e kalī yā phuul khileñ
sayyād tujhe kyā matlab hai tū ashk gine jā bulbul ke

chaman meñ jab bhī tire pairahan kī bū aa.ī
bahār bhiig ga.ī sharm se pasīne meñ

maiñ tere baaġh kā barg-e-ḳhizāñ-rasīda huuñ
tū vo kalī hai ki jis par bahār aaj bhī hai

dil niiñ pakḌī hai yaar kī sūrat
gul huā hai bahār kī sūrat

jalva-e-sāġhar-o-mīnā hai jo ham-rañg-e-bahār
raunaqeñ turfa taraqqī pe haiñ mai-ḳhānoñ kī

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

do din meñ gulū bahār kyā kī
rañgat vo rahī na bū tumhārī

vo havā chalī ki mire chaman hue raakh aur dhuveñ ke ban
ki hare shajar bhī sulag uThe ye bharī bahār meñ kyā huā

ābla-pā koī guzrā thā jo pichhle san meñ
surḳh kāñToñ kī bahār aa.ī hai ab ke ban meñ

shohra hai bahār-e-āriz kā bulbul kī tarah āshiq haiñ fidā
hai bāġh-e-javānī rūh-afzā barg-e-gul-e-tar hai partav-e-ruḳh