Tags-Bahaar

kuchh mizāj-e-gul-o-saman bhī samajh
sirf nazzāra-e-bahār na kar

aur paidā kar apne ḳhuun se phuul
rāt-din mātam-e-bahār na kar

ḳhaar ko bhī nazar meñ rakh 'ra.anā'
gul se andāza-e-bahār na kar

ghuT ke rah saktī thī kab tak ātish-e-rañg-e-bahār
zarb-e-mausam bhī kuchh aisī thī ki sab gulshan jalā

bahār-āgīñ hayāt-afroz phuul ban kar
lahū kā chhīñTā qabā-e-īsār par khilā hai

bahār aa.ī bhī 'ḳhāvar' to kyā bahār aa.ī
chaman ke phuul to mahrūm-e-rañg-o-bū hī rahe

ḳhūn-e-jigar sharāb o tarashshah hai chashm-e-tar
sāġhar mirā giro nahīñ abr-e-bahār kā

jo guloñ ne chehre pe mal liyā jo kalī ne maañg meñ bhar liyā
vo ghaḌī bhī aa.egī dekhnā yahī rañg ḳhūn-e-bahār he

koī hasb-e-hāl ḳhitāb ho mire dil ko dil na kahā karo
use kyuuñ bahār kā naam do jo ḳhizāñ nasīb-e-bahār hai

haiñ jigar meñ daaġh lahū hai dil haiñ tar āñkheñ siina figār hai
yahī rañg-o-bū yahī fasl-e-gul yahī be-kasoñ kī bahār hai

mujhe ab havā-e-chaman nahīñ ki qafas meñ guuna qarār hai
ye to pichhle saal jo aa.ī thī vahī chaar din kī bahār hai

tire dil kī bhī na kalī khile tire haath TūTeñ ḳhudā kare
jise toḌe letā hai bāġhbāñ yahī phuul jān-e-bahār hai

jo tire pasīne kī bū na de to kuchh aur hai gul-e-tar nahīñ
jo taḌap na de tire husn kī vo bahār nañg-e-bahār hai

tire daraḳhtoñ kī Tahniyoñ par bahār utre
tirī guzargāheñ nek rāhoñ kī manzileñ hoñ

milnā hamārā ḳhaak meñ zaa.e.a na jā.egā
de jā.eñge chaman ko shu.ūr-e-bahār ham

qabā-e-lāla-o-gul meñ jhalak rahī thī ḳhizāñ
bharī bahār meñ royā kiye bahār ko ham

hai shahr-e-ulfat meñ qadġhanoñ se ajiib ḳhauf-o-hirās rahnā
ḳhizāñ ke aane pe yaas chhā.e bahār ho to pur-ās rahnā

sayyād ab to chhoḌ de aatī hai fasl-e-gul
dekhūñgā haa.e kyuuñ ki tamāshā bahār kā

mohabbat ne chhoḌā ye turfa shagūfa bahār-e-javānī bhī dil ne na dekhī
abhī phūlne-phalne ke din kahāñ the magar kaT ga.ī naḳhl-e-ummīd kī jaḌ

bahār-e-javānī hayāt-e-javānī na ye ġhair-fānī na vo ġhair-fānī
urūs-e-chaman kā utartā hai gahnā ḳhizāñ ke zamāne meñ hotī hai patjhaḌ