Tags-Bahaar

tarh-e-kashāñ jise hijrān-e-yār kahte haiñ
ham us ko vasl hamesha bahār kahte haiñ

bahār naam hai tahzīb-e-mausam-e-dil kā
avaam mausam-e-gul ko bahār kahte haiñ

jān-e-bahār-e-gulsitāñ zohra-jamāl nāznīñ
'nayyar'-e-ḳhush-ḳhayāl ke fikr-o-nazar pe chhā.e jā

sune hai maiñ ne fuġhān-e-bulbul bahār meñ hai mujhe ta.ammul
chaTak rahā hai jo ġhuncha-e-gul sadā-e-naqqāra-e-ḳhizāñ hai

khule haiñ dāġhoñ ke phuul tan par bahār-e-tāza hai ai gul-e-tar
kabhī to merī taraf nazar kar chaman meñ kyā shāḳh-e-za.afrān hai

uf vo soī huī khoī huī fitrat kī bahār
uf vo mahkī huī bahkī huī barsāt kī raat

shagufta kaliyoñ kī dil kī dhaḌkan udaas lamhoñ meñ so ga.ī hai
sukūt vo chhā gayā ki har-sū bahār kartī hai saa.eñ saa.eñ

ḳhizāñ ke hosh kisī roz maiñ uḌātā huā
tumheñ dikhūñgā yaqīnan bahār laatā huā

merī āñkhoñ meñ haiñ aañsū tere dāman meñ bahār
gul banā saktā hai tū shabnam banā saktā huuñ maiñ

tere aa jaane se phir aa ga.ī zaḳhmoñ pe bahār
tū nahīñ aatā to sab zaḳhm purāne lagte

ḳhizāñ kā vasvasa hai fasl-e-gul meñ
zarūrat hai bahār-e-be-ḳhizāñ kī

guñdhvā ke dil ko laa.e haiñ phūloñ ke haar meñ
ye haar un ko nazr kareñge bahār meñ

kafnā.e bāġhbāñ mujhe phūloñ ke haar meñ
kuchh to burā ho dil mirā ab kī bahār meñ

shāyad jagah nasīb ho us gul ke haar meñ
maiñ phuul ban ke ā.ūñgā ab kī bahār meñ

'sīmāb' phuul ugeñ lahad-e-andalīb se
itnī to zindagī ho havā-e-bahār meñ

bādal kī ye garaj nahīñ abr-e-bahār meñ
barrā rahā hai koī sharābī ḳhumār meñ

ḳhizāñ kā zikr kyā vo daur thā nā-sāz-gārī kā
bahār aa.ī hai ab ahl-e-chaman kī āzmā.ish hai

tire gulistāñ kī aabrū hai mahak tirī infirādiyat kī
tū kasmapursī se bujh bhī jaa.e to ġhairat-e-nau-bahār hogā

har ḳhizāñ kī kokh se hotī hai paidā nau-bahār
dāman-e-ummīd mailā aur na dil nāshād kar

gosh-e-gul-bahār meñ kis ne kahā hai harf-e-shauq
kaun hai merā tarjumāñ kis ko milī mirī zabāñ