Tags-Bahaar

mastoñ pe uñgliyāñ na uThāo bahār meñ
dekho to hosh hai bhī kisī hoshyār meñ

pazhmurda ek hai to shagufta hai dūsrā
bāġh-e-jahāñ meñ fasl-e-bahār-o-ḳhizāñ nahīñ

kyā fikr-e-bahār o mahfil-e-yār
ab ḳhatm vo baab ho gayā hai

ba-rañg-e-gul rahe ham bhī mizāj-dān-e-bahār
bas ek baar hañse phir kabhī hañsā na gayā

ye kahāñ bahār-e-jamāl hai ki jahāñ ḳhizāñ na zavāl hai
tirī bazm-e-nāz se jo uThā vo hasīñ uThā vo javāñ uThā

tere qurbān 'qamar' muñh sar-e-gulzār na khol
sadqe us chāñd sī sūrat pe na ho jaa.e bahār

bahār aa.egī dil ko hai ab yaqīn mire
ḳhayāl-o-ḳhvāb meñ phūloñ ke kārvāñ dekhūñ

ye bāġhbāñ hamāre lahū kā kamāl hai
nairañgī-e-bahār-e-chaman aur baḌh ga.ī

tire dil kī aag haqīqatan tire haq meñ fasl-e-bahār hai
jo bujhā.e se bhī na bujh sake usī dil kī aag meñ jal ke aa

asar-āfrīn-e-bahār hai tirī fikr 'shā.ir'-e-ḳhush-navā
jinheñ chhū sake na ḳhizāñ kabhī vahī phuul le ke ġhazal ke aa

numū ke faiz se rañg-e-chaman nikhar sā gayā
magar bahār meñ dil shorishoñ se Dar sā gayā

usūl-e-āmad-o-raft-e-bahār kyā kahiye
kalī jo shāḳh pe aa.ī gulāb TuuT gayā

har aarzū meñ rañg hai bāġh-o-bahār kā
kāñTā bhī ek phuul hai us ḳhār-zār kā

ye hādsa hai ki donoñ ḳhizāñ-sarisht hue
magar bahār kā ik ahd darmiyān meñ thā

ajab nahīñ kabhī naġhma bane fuġhāñ merī
mirī bahār meñ shāmil hai ab ḳhizāñ merī

isī tarah ḳhūn-e-dil se tū chaman ko sīñchtā jā
ye ḳhizāñ 'shamīm' jab tak ki bahār ho na jaa.e

mere dil meñ surūr-e-sub.h-e-bahār
terī āñkhoñ meñ raat phūloñ kī

saudā pukārtā hai ye fasl-e-bahār meñ
gulshan na mol lījiye zindāñ ḳharīdiye

bahār-e-lāla-o-gul ke qasīde ḳhatm hue
ḳhizāñ kā marsiya paḌhtā hai har shajar ab ke

ḳhizāñ kī āfateñ phirtī haiñ ab tak merī nazroñ meñ
bahār-e-chañd-roza kyā dikhātā hai chaman mujh ko