Tags-Bahaar

ḳhizāñ kī āfateñ phirtī haiñ ab tak merī nazroñ meñ
bahār-e-chañd-roza kyā dikhātā hai chaman mujh ko

na hai 'shā.ir' ab ġham-e-nau-ba-nau na vo dāġh-e-dil na vo tāzgī
jinheñ e'timād-e-bahār thā vahī phuul rañg badal ga.e

huā zāhir ḳhat-e-rū-e-nigār āhista-āhista
ki jyuuñ gulshan meñ aatī hai bahār āhista-āhista

bahār-e-umr meñ bāġh-e-jahāñ kī sair karo
khilā huā hai ye gulzār dekhte jaao

mirī bahār abhī lauT kar nahīñ aa.ī
maiñ ḳhushk peḌ huuñ aur gulsitāñ meñ rahtī huuñ

kahūñ kyā 'sirāj' tum se jo guzar rahī hai dil par
ye qafas kī zindagī aur ye bahār kā zamāna

barq uTThī balā.eñ lene ko
hai qafas par bahār kā aalam

un ke ruḳh par nikhār kā aalam
gulistāñ par bahār kā aalam

bahār tujh ko dikhā.eñge ham bhī ai gul-rū
kisī ravish se jo ġhuncha kabhī khilā dil kā

qafas meñ mausamoñ kā koī andāza nahīñ hotā
ḳhudā jaane bahār aa.ī chaman meñ yā ḳhizāñ aa.ī

ḳhizāñ meñ dekh lenā vādī-e-pur-ḳhār se bad-tar
chaman bhī hai bahār-e-lāla-o-nasrīn-o-sosan tak

sehn-e-chaman meñ apne 'nazar' thī ajab bahār
thā daur-e-abr-o-bād abhī kal kī baat hai

ā.īne meñ vo dekh rahe the bahār-e-husn
aayā mirā ḳhayāl to sharmā ke rah ga.e

ye nayā tarz-e-karam hai tirā ai fasl-e-bahār
le liyā paas meñ jo kuchh thā diyā kuchh bhī nahīñ

ā.eñge vaqt-e-ḳhizāñ chhoḌ de aa.ī hai bahār
le le sayyād qasam rakh de gulistāñ sar par

kāñToñ ke din bhī phir ga.e raas aa ga.ī bahār
chhīnī ga.iiñ guloñ kī qabā.eñ to kyā kareñ

ai gul jo bahār aa.ī hai vaqt-e-ḳhud-ārā.ī
ye rañg-e-junūñ kaisā ye jāma-darī kyuuñ hai

sadā-bahār ho tum aur merī qismat ho
koī bahār na thī is bahār se pahle

ne tujh pe vo bahār rahī aur na yaañ vo dil
kahne ko nek-o-bad ke ik ilzām rah gayā

mirā vaqt mujh se bichhaḌ gayā mirā rañg-rūp bigaḌ gayā
jo ḳhizāñ se baaġh ujaḌ gayā maiñ usī kī fasl-e-bahār huuñ