Tags-Bahaar

chaman kī dilchaspiyāñ kahāñ haiñ na chahchahe haiñ na qahqahe haiñ
qadam jamā.e haiñ kyā ḳhizāñ ne ki aaj rañg-e-bahār badlā

dayār-e-dil meñ hai phir dāġh-e-ishq kā toḌā
junūñ matā-e-havas mausam-e-bahār meñ luuT

guloñ kā daur hai bulbul maze bahār meñ luuT
ḳhizāñ machā.egī aate hī is dayār meñ luuT

jab iḳhtiyār chaman par nahīñ to ham ko kyā
hazār baar agar mausam-e-bahār aayā

ḳhizāñ kā daur gayā mausam-e-bahār aayā
magar na is dil-e-be-sabr ko qarār aayā

kam-sinī kā husn thā vo ye javānī kī bahār
thā yahī til pahle bhī ruḳh par magar qātil na thā

uf vo raavī kā kināra vo ghaTā chhā.ī huī
shaam ke dāman meñ sabze par bahār aa.ī huī

le gayā chaman ko bhī mausam-e-bahār aa kar
ab qafas kā gosha hai hāsil-e-bahār apnā

ye baat sab ko batā.ī thī mirzā ġhālib ne
bahār ghar meñ thī sahrā uḌā rahā thā maiñ

āġhosh-e-gul kushūda barā-e-vidā hai
ai andalīb chal ki chale din bahār ke

kaf-e-ḳhizāñ pe khilā maiñ is e'tibār ke saath
ki har numū kā ta.alluq nahīñ bahār ke saath

jab bhī jān-e-bahār miltā hai
dil ko sabr-o-qarār miltā hai

agar safar meñ mire saath merā yaar chale
tavāf kartā huā mausam-e-bahār chale

kahīñ kalī ne tabassum kā raaz samjhā hai
jo ḳhud chaman hai vo apnī bahār kyā jaane

kabhī shāḳh o sabza o barg par kabhī ġhuncha o gul o ḳhaar par
maiñ chaman meñ chāhe jahāñ rahūñ mirā haq hai fasl-e-bahār par

qafas meñ bhī kaisī bahār aa ga.ī hai
qafas meñ jo zikr-e-bahār aa gayā hai

mausam badlā rut gadrā.ī ahl-e-junūñ bebāk hue
fasl-e-bahār ke aate aate kitne girebāñ chaak hue

qasam hai laala o gul ke udaas chehroñ kī
fareb de na sakā mausam-e-bahār mujhe

namī utar ga.ī dhartī meñ tah-ba-tah 'aslam'
bahār-e-ashk na.ī rut kī ibtidā meñ hai