Tags-Bahaar

ba-nām-e-fasl-e-bahār 'āzar' vo zard patte hī mo'tabar the
jo hañs ke rizq-e-ḳhizāñ hue haiñ jo sabz shāḳhoñ pe jhuul aa.e

daraḳht-e-jāñ par azāb-rut thī na barg jaage na phuul aa.e
bahār-vādī se jitne panchhī idhar ko aa.e malūl aa.e

ham fidā-e-chaman qafas meñ bhī
zikr-e-fasl-e-bahār sunte haiñ

phūloñ ko sajāyā hai palkoñ ko bichhāyā hai
ai bād-e-sabā kah de ab jaane bahār aa.e

khil jā.eñgī ye kaliyāñ mahbūb ke aamad se
jis raah se vo guzre gulshan meñ bahār aa.e

hañs de to khile kaliyāñ gulshan meñ bahār aa.e
vo zulf jo lahrā.eñ mausam meñ nikhār aa.e

mohabbat ke fasāne aaj bhī tahrīr hote haiñ
bahār-e-zindagānī ko purānī kaun kahtā hai

ab ke bahār dekhiye kyā naqsh chhoḌ jaa.e
āsār bādaloñ ke na patte shajar meñ haiñ

bahār-e-gul meñ thā jaame se bāhar ai 'ātish'
na kartā maiñ jo garebāñ ko paara kyā kartā

bahār-e-gul meñ piyāla lagā liyā muñh se
sharāb piine ko maiñ istiḳhāra kyā kartā

bahār thī jo vo gul-chehra yaar bhī hotā
akele jā ke chaman kā nazāra kyā kartā

bahār-e-gul meñ haiñ dariyā ke josh kī lahreñ
bhalā maiñ kashtī-e-mai se kināra kyā kartā

kaf-e-bāġhbāñ pe bahār-e-gul kā hai qarz pahle se besh-tar
ki har ek phuul ke pairahan meñ numūd mere lahū kī hai

bāġhbāñ fasl-e-bahār aane pe va.ada to qubūl
aur agar ham na rahe fasl-e-bahār aane tak

bahār aa.ī chaman meñ go mujhe kyā
giraftār o asīr-e-dām huuñ maiñ

bahār-e-gulshan-e-ayyām huuñ maiñ
sahar nuur o savād-e-shām huuñ maiñ

chaman kā pyaar mil sakā na dasht kī bahār ko
kalī bikas ke rah ga.ī sabā machal ke rah ga.ī

shāyad ki shām-e-hijr ke maare bhī jī uTheñ
sub.h-e-bahār-e-hashr kā chehrā utar gayā

bahār aa.ī to jaise yak-bār
lauT aa.e haiñ phir adam se

bas ek lafz mirā phuul sā khilā degā
bahār ban ke tire ghar ko bhī sajā degā