Tags-Bahaar

ab ke havā.eñ kaun sī rut le ke aa.ī haiñ
sahrā bhī pur-bahār hai ab ke chaman ke saath

fusūñ-shanās huuñ maiñ rañg-o-bū samajhtā huuñ
fareb-ḳhurda-e-rañgīnī-e-bahār nahīñ

dāman-e-lāla-zār meñ
ālam-e-pur-bahār dekh

jis jis ke paas dosto jis jis kā yaar hai
behtar chaman se ghar meñ isī ke bahār hai

'fazā' na thā kabhī taaza dimāġh itnā maiñ
hai us kā haath ki shāḳh-e-bahār sar par hai

ham rind ḳhāk-o-ḳhūñ meñ aTe haath bhī kaTe
nikle na ai bahār tire gesuoñ ke bal

ka.abe ko jā na 'shauq' abhī niyyat-e-zindagī ba-ḳhair
ham bhī chaleñge tere saath ab kī bahār dekh kar

kaifiyat-e-bahār jo yaad aa.ī zer-e-ḳhāk
dāġh-e-junūñ se apnī tabī.at bahal ga.ī

ḳhizāñ ne luuT liyā gulshan-e-shabāb magar
kisī bahār ke armān meñ javāñ huuñ maiñ

ḳhizāñ kahtī thī maiñ shoḳhi-e-bahārāñ huuñ
bahār kahtī hai rañgīni-e-ḳhizāñ huuñ maiñ

tere jamāl se mirī ā.ankhoñ meñ nuur hai
terā ḳhayāl hai to maiñ bāġh-o-bahār huuñ

ye bahār-e-be-sāḳhta chalī aa.ī hai kahāñ se
tan-e-zard meñ khil uThā hai piile gulāb sā kuchh

sab ḳhizāñ ke pattoñ meñ gul-bahār manzar hai
ḳhushbuoñ ke aane kī muḳhbirī nahīñ hotī

dekhiye kyā gul khilātī hai bahār ab ke baras
ḳhvāb meñ 'fānī' ne dekhā hai qafas kā dar khulā

dāġh-e-dil jal uThe jo gul mahke
rañg dikhlā ga.ī bahār apnā

bahut rahā hai kabhī lutf-e-yār ham par bhī
guzar chukī hai ye fasl-e-bahār ham par bhī

bahār-e-ḳhud-numā.ī ho chukī bas
jahāñ chhūTī havā.ī ho chukī bas

ye kaifiyat thī aur ek jogan sitār baiThī bajā rahī thī
magar vo jañgal kī shāhzādī bahār ke giit gā rahī thī

nazar meñ shā.er ke phir rahā hai, harā-bharā pur-bahār jañgal
vo sub.h-e-rañgīñ, vo kaif-e-manzar, vo dāman-e-koh bindhiyā-chal