Tags-Bahaar

qafas se duur sahī mausam-e-bahār to hai
asīro aao zarā zikr-e-āshiyāñ ho jaa.e

ye iftiḳhār-e-shajar shāḳh-e-nau-bahār se hai
jo pā.emāl-e-ḳhizāñ thā vo sar-buland huā

ḳhizāñ meñ bhī rahā 'kausar' shagufta hausla apnā
bahār-e-naġhma sāz-e-dard kā āhañg ham se hai

ḳhizāñ ke jaane se ho yā bahār aane se
chaman meñ phuul khileñge kisī bahāne se

sayyād bhī pahuñch gayā gul-chī bhī baaġh meñ
ai ham-safīr aa gayā mausam bahār kā

zaḳhm hañste haiñ to ye fasl-e-bahār aatī hai
haañ isī baat pe phir zaḳhm lagāyā jaa.e

chaman meñ rah ke bhī 'ātish' ḳhizāñ-nasīboñ ko
kabhī bahār kā paiġhām-e-jāñ-fazā na milā

guloñ kī mahfil-e-rañgīñ meñ ḳhaar ban na sake
bahār aa.ī to ham gulsitāñ se lauT aa.e

paiham udāsiyoñ se bayābāñ hai zindagī
dil meñ bahār ho to gulistāñ hai zindagī

maiñ gul-e-ramīda-e-rañg-o-bū tū bahār-e-mai-kada-e-numū
maiñ hamesha ḳhasta-e-ārzū tū hamesha aish-e-javāñ rahā

asar-e-bahār-e-ḳhizāñ asar hai ki hai fasurda mirī nazar
na havā-e-ishrat-e-bāl-o-par na junūn-e-bāġh-e-jināñ rahā

nahīñ sabr sāqiyā lā bhī de qadah-e-bahār uThā bhī de
abhī sin hai lā ke pilā bhī de ki hamesha kaun javāñ rahā

ye bahār-e-gulshan-e-āb-o-gil hai fanā asar to hoñ kyuuñ ḳhajil
vo gul-e-fasurda hai merā dil ki hamesha nazr-e-ḳhizāñ rahā

na chaman hai vo na bahār hai na vo bulbuleñ na hazār hai
yahī chār-samt pukār hai na vo rut hai ab na samāñ rahā

tū matā-e-gul-kada-e-nazar gul-e-nau-bahār-e-bahisht-asar
maiñ vo andalīb-e-shikasta par ki hamesha mahv-e-fuġhāñ rahā

maiñ huuñ nasīm to bahār maiñ huuñ shamīm zulf-e-yār
go ki nazar se huuñ nihāñ dāḳhil-e-anjuman huuñ maiñ

phir harīf-e-bahār ho baiThe
jaane kis kis ko aaj ro baiThe

chaman meñ rah ke bhī 'qaisar' mujhe nahīñ ma.alūm
bahār kahiye use yā use ḳhizāñ kahiye

gul ke mānind chaak chaak ho dil
itnā shā.ista-e-bahār karo

apne dāman kī chand kaliyoñ se
tum na andāza-e-bahār karo