Tags-Bahaar

dosto mujh ko na do sair-e-chaman kī taklīf
ashk hī bas hai mirā bāġh-o-bahār-e-dāman

ham to us vaqt samajhte haiñ ki aatī hai bahār
dasht se jab koī jhankār sī aa jaatī hai

khulā chaman na havā meñ phir ai naqīb-e-bahār
abhī to zaḳhm hare haiñ tirī duā se mire

tasavvur meñ koī aayā sukūn-e-qalb-o-jāñ ho kar
mohabbat muskurātī hai bahār-e-jāvedāñ ho kar

zauq-e-bahār hī hai na ḳhauf-e-ḳhizāñ mujhe
gum-sum hai apne haal meñ tab-e-ravāñ kahāñ

hai nasīm-e-bahār gard-ālūd
ḳhaak uḌtī hai us makān meñ kyā

mile jo mujh ko bhī fursat ġham-e-zamāna se
kisī ke sāmne zikr-e-bahār maiñ bhī karūñ

chale haiñ gañg-o-jaman kī vaadī meñ ham havā-e-bahār ban kar
himāliya se utar rahe haiñ tarāna-e-ābshār ban kar

ye kaisī bād-e-bahār hai jis meñ shāḳh-e-urdu na phal sakegī
vo kaisā rū-e-nigār hogā na zulf jis par machal sakegī

pāmāl ho ke rah ga.e jashn-e-bahār meñ
ye fikr thī chaman pe ḳhizāñ kā na bas chale

kyā havā-e-bahār taaza hai
kyā charāġh-e-sarā.e ibrat hai

aise khulte haiñ falak par ye sitāre shab ke
jis tarah phuul hoñ saare ye bahār-e-shab ke

mānind-e-'sirāj' soz-o-ġham meñ
jalne kuuñ bahār būjhtā huuñ

rāzdār-e-bahār-e-rafta na ho
yuuñ to is ḳhār-o-ḳhas meñ kuchh bhī nahīñ

ye kamāñ-kashān-e-zah-e-ġhurūr phireñ haiñ kis kī talāsh meñ
vo jo bāġh-e-jāñ kī bahār the vo basā chuke haiñ qafas qafas

pilā ai giroh-e-suḳhanvarāñ koī sher-e-tar gul-e-tāza ras
ye bahār meñ bhī ḳhamoshiyāñ na sar-e-junūñ na pa.e havas

chaman kī aañkh se mausam ke husn ko dekhūñ
bahār aa.e to pattoñ ke pairahan pahnūñ

un ko yaañ vaade pe aa lene de ai abr-e-bahār
jis qadar chāhnā phir baad meñ barsā karnā

kahāñ bashārat-e-fasl-e-bahār laa.ī thī
havā to baaġh kī izzat utaar laa.ī thī

savād-e-shab meñ ik āvāz par huuñ garm-e-safar
asīr-e-zulf na āvāra-e-bahār huuñ maiñ