Tags-Bahaar

bahār ban ke vo aayā gayā bhī shaan ke saath
ki zard pattoñ pe rañg-e-gulāb chhoḌ gayā

ā.īna-e-bahār ke kuchh aks-e-muzmahil
ḳhushbū kā rañg pā ke gulāboñ meñ kho ga.e

ye bahār hovegī sab ḳhizāñ na saman na laala na arġhavāñ
dam-e-garm kī mire dostāñ kabhū baaġh meñ jo havā ga.ī

paroñ se muñh ko chhupā kar qafas meñ aa baiThā
chaman kā haal na dekhā gayā bahār ke ba.ad

qābil-e-dīd hai mashshātgī-e-fasl-e-bahār
zulf-e-sumbul meñ nayā husn nazar aatā hai

yahī tārīḳh-e-chaman hai yahī tārīḳh-e-bahār
pahle do chaar hī phūloñ pe nikhār aatā hai

jalva-e-nau-bahār ne luuT liyā luTā diyā
gesu-e-mushk-bār ne luuT liyā luTā diyā

aa.e bhī yā na aa.e ab mujh ko ġharaz bahār se
kaif-e-ġham-e-bahār ne luuT liyā luTā diyā

sau tarah kī bahār hai sau rañg kī ḳhizāñ
is dil kī vus.atoñ meñ kahīñ kho na jaa.eñ ham

sargarm-e-nāla kyuuñ rahī bulbul bahār meñ
kyā ham na the asiir ki zauq-e-fuġhāñ na thā

maiñ ne maanā aarzī haiñ vasl kī ghaḌiyāñ magar
chand lamhoñ ke liye daur-e-bahār aa hī gayā

ahd-e-ḳhizāñ bahār kī rut naam haiñ faqat
kyā baat kah ga.ī hai nasīm-e-sahar mujhe

na mujh pe lutf-e-sahar huā hai na mujh pe vā koī dar huā hai
na maiñ ne dekhī hai rut suhānī na mujh pe abr-e-bahār chhāyā

shab-e-hijr ab ye satā.e hai ki ḳhizān-e-marg dikhā.e hai
vo ruḳh ab kahāñ nazar aa.e hai ki jo rashk-e-sub.h-e-bahār thā

bahār aa.e to ḳhud hī laala o nargis batā deñge
ḳhizāñ ke daur meñ dilkash gulistānoñ pe kyā guzrī

tinkoñ se khelte hī rahe āshiyāñ meñ ham
aayā bhī aur gayā bhī zamāna bahār kā

un rāstoñ meñ nām-o-nasab kā nishāñ na thā
hañgāma-e-bahār meñ ḳhilqat jidhar ga.ī

hai ajiib qism kī bad-zanī mujhe us kī koī ḳhabar nahīñ
gul-o-ḳhār ko bhī bahār meñ mire gulsitāñ se gurez hai

mujhe kis tarah se na ho yaqīñ ki use ḳhizāñ se gurez hai
jo nasīm-e-sub.h-e-bahār ko mire gulsitāñ se gurez hai

ġhuncha-o-gul the yahī lekin ye ra.anā.ī na thī
is gulistāñ meñ bahār is dhuum se aa.ī na thī