Tags-Bahaar

jab bhī dekhī hai kisī chehre pe ik taaza bahār
dekh kar maiñ tirī tasvīr purānī royā

'nazar' chaman meñ agar vāqa.ī bahār aatī
to phuul ḳhvāhish-e-abr-e-bahār kyuuñ karte

aap socheñ 'nazar' kis liye mast hai
aap ke saath abr-e-bahār aa gayā

do-chār saal aur bhī imkāñ nahīñ to kyā
fasl-e-bahār aa.egī jhūmeñgī Dāliyāñ

tumhārā daur thā ghar meñ bahār hañstī thī
abhī to dar pe faqat ranj-o-ġham kī dastak hai

bāġh-o-bahār hai vo maiñ kisht-e-za.afrāñ huuñ
jo lutf ik idhar hai to yaañ bhī ik samāñ hai

mahaktī zulfoñ se ḳhoshe guloñ ke chhūT gire
kuchh aur jaise ki gunjā.ish-e-bahār na thī

bahār kaun sī tujh meñ jamāl-e-yār na thī
mushāhida thā tirā sair-e-lāla-zār na thī

namī utar ga.ī dhartī meñ tah-ba-tah 'aslam'
bahār-e-ashk na.ī rut kī ibtidā meñ hai

bahār aa.ī chaman meñ gul khile ai bāġhbāñ shāyad
junūñ ne dhajjiyāñ gar jo uḌā.īñ phir garebāñ kī

bahār aa.ī na thī lekin havāoñ meñ na.e mausam kī ḳhushbū raqs kartī thī
achānak jab kahā tum ne mire muñh par mujhe jhūTā ḳhizāñ ke āḳhirī din the

chand sikkoñ pe huā kartā hai har shab ko nisār
mere siine kā gudāz aur javānī kī bahār

ḳhatā chaman kī ki hai mubtalā-e-lāla-o-gul
bahār sirf ḳhas-o-ḳhār kī talāsh meñ hai

paiġhām-e-bahār de rahī hai
dāġhoñ kī jhalak diloñ kī uljhan

mire nāma-bar ne jo ḳhat diyā mujhe lā ke jān-e-bahār kā
huī zehn-o-dil kī vo kaifiyat na paḌhā gayā na sunā gayā

kuchh ab kī baaġh meñ is dhuum se bahār aa.e
na bāġhbāñ kī sunūñ maiñ na bāġhbāñ merī

mujhe ye Dar hai na phūle phale bahār meñ ye
jhukī huī hai bahut shāḳh-e-āshiyāñ merī

kyuuñ phañsā gulshan meñ yuuñ jā kar abas saudā tū ab
meñ na kahtā thā tujhe vo dekh aatī hai bahār

shor ye ġhunchoñ ke vā-shud kā nahīñ ai andalīb
ab chaman meñ tumtarāq apnā dikhātī hai bahār

dekhne de bāġhbāñ ab gulsitāñ apnā mujhe
halqa-e-zanjīr meñ mehmāñ bulātī hai bahār