Tags-Bahaar

shor ye ġhunchoñ ke vā-shud kā nahīñ ai andalīb
ab chaman meñ tumtarāq apnā dikhātī hai bahār

dekhne de bāġhbāñ ab gulsitāñ apnā mujhe
halqa-e-zanjīr meñ mehmāñ bulātī hai bahār

bahār-e-gulistāñ ham ko na pahchāne ta.ajjub hai
guloñ ke ruḳh pe chhiḌkā hai bahut ḳhūn-e-jigar ham ne

āḳhir bahār ko to jo karnā thā kar ga.ī
ilzām-e-ehtiyāt girebāñ ke sar gayā

koī bhī rut ho vo apnā jamāl rakhtī hai
ḳhizāñ jo aa.e to is ko bahār mat karnā

ġham-e-mohabbat meñ dil ke dāġhoñ se rū-kash-e-lāla-zār huuñ maiñ
fazā bahārīñ hai jis ke jalvoñ se vo harīf-e-bahār huuñ maiñ

kyā mastiyāñ chaman meñ haiñ josh-e-bahār se
har shāḳh-e-gul hai haath meñ sāġhar liye hue

tasvīr kī ragoñ meñ lahū dauḌne lagā
kyā aa gayā jahān meñ mausam bahār kā

itnī to aarzū hai kabhī yaad kar leñ dost
shāyad kabhī phir aa.e zamāna bahār kā

bhaḌkī huī thī surḳh guloñ se chaman meñ aag
dāman na jal gayā ho nasīm-e-bahār kā

azāb-e-gard-e-ḳhizāñ bhī na ho bahār bhī aa.e
is ehtiyāt se ajr-e-vafā na māñge koī

sadā kā loch suḳhan kā nikhār le ke chale
tirī nazar se fusūn-e-bahār le ke chale

tarīq-e-kohna pe ab nazm-e-gulistāñ na rahe
mirī bahār ko andesha-e-ḳhizāñ na rahe

havā-e-daur-e-mai-e-ḳhush-gavār raah meñ hai
ḳhizāñ chaman se hai jaatī bahār raah meñ hai

is iram iram zamīñ par ki bahār umañD rahī hai
koī phuul agar khilā de mirī be-numū bhī

de kar chaman ko bahār-o-ḳhizāñ kā rañg
mere ḳhayāl-o-ḳhvāb pe ehsāñ kiyā gayā

dam-zadan meñ nahīñ jā.egī bahār-e-gulshan
aable phūTeñge ai ābla-pā āhista

bujhī hai ātish-e-rañg-e-bahār āhista āhista
gire haiñ shola-e-gul se sharār āhista āhista

mere liye hazār tabassum thī vo bahār
jo āñsuoñ kī raah pe mujh ko lagā ga.ī

sarsabz nit rakheñge unheñ mere ashk o aah
ai nau-bahār-e-husn jo chāhe chaman lagā